РабигIул аввалалда дандчIвай
ХIурматиял бусурбаби, гьале исанаги тIаде щолеб буго жинда жанив хирияв авараг ﷺ гьавураб РабигIул аввал моцI. Гьеб моцIалъ нилъеца кIодо гьавула авараг ﷺ ва гьесул хьвада-чIвади, сират ракIалде щвезабула. Авалалдаса байбихьун гьанжелъизегIанги, бетIералда чIахIиял гIалимзабигун, гIадатиял бусурбабаз аварагасул ﷺ мавлид кIодо гьабулаан. Гьеб гьабиялъе руго гIемерал хIикматал, далилал ва гIиллаби. Гьале гьезул цо-цоял.
ТIоцебесеб. Авараг ﷺ вокьизе, хIатта нилъер лъималаздаса, буголъиялдаса ва нилъго нилъедасаго, бусурбабаздаса тIалаб гьабун буго Аллагьас ﷻ. Гьайгьай, цогидалда гьоркьоб, гьев гьавиялдаса рохизеги.
КIиабилеб. Аварагас ﷺ живго гьавураб итни къоялде кIвар кьолаан. Гьес итни къоялъ кIал кколаан. Щай гьедин гьабулебин гьикъидал, аварагас ﷺ абуна: «Гьеб къоялъ дун гьавуна», - ян. Гьаб кьучIаб хIадис гIеларищ бичIчIи бугев чиясе. Аварагас ﷺ рецц гьабулаан Аллагьасе ﷻ гьес живго вижаралъухъ, гIумру кьуралъухъ, халкъалъе рахIматлъун витIаралъухъ. Бусурбабаздаги рекъеларищ аварагасда ﷺ нахърилълъун, гьес гIадин щукру гьабизе.
Лъабабилеб. Мавлид буго авараг ﷺ гьавиялдаса рохел загьир гьабун, гьев вокьиялъул мажлис гIуцIизе бусурбаби данде ракIари. ХIадисалда буго: «Къиямасеб къоялъ щивав чи вукIине вуго жидеего рокьаралгун цадахъ», - ян.
Ункъабилеб. Авараг ﷺ гьавиялъул, гьесул ﷺ гIумруялъул ва авараглъиялъул бициналдалъун лъай цIикIкIуна. Лъалеб букIаразда ракIалде щола. Аварагасде ﷺ рокьи цIикIкIуна. Иман щулалъула. Живго Аллагьаслъидал ﷻ Къуръаналда, цересел аварагзабазул гIемерал къисаби рехсон ругел. Дур ракI щула гьабизелъун рицунел ругин гьел къисабиян баян гьабуна Аллагьас ﷻ аварагасе ﷺ.
Щуабилеб. Аварагас ﷺ сайгъатал кьолаан шигIрабалъ живго веццарал шагIирзабазе. Гьеб кколарищ аварагасﷺ жив веццизе ихтияр кьей.
Анлъабилеб. Исламалда цIакъ беццараб буго бусурбабаз цадахъ данделъун гIибадат гьаби. Садакъа кьеялъул хиралъабазулги бицинейищха ккелеб.
МухIаммад аварагасулъ ﷺ буго щивав бусурбанчиясе кутакаб мисал – Аллагьасе ﷻ мутIигIлъиялъулъ, гIибадат гьабиялъулъ, зикру бачиналъулъ, мунагьал чури тIалаб гьабиялъулъ, тавбу гьабиялъулъ, хIалимлъиялъулъ, тIаса лъугьиналъулъ. МухIаммад аварагасул ﷺ хIукъукъаздасан буго: гьесул ﷺ цIар рагIараб мехалъ, гьесде свалат битIи. Аллагьас ﷻ абулеб буго (магIна): «ХIакълъунго, Аллагьас ﷻ ва Гьесул малаикзабаз свалат битIулеб буго МухIаммад аварагасдеﷺ. «Ле, гьал иман лъурал чагIи! БитIе нужецаги гьесде свалат ва саламги», - ян. Аварагас ﷺ абуна: «Щив чияс битIаниги диде цохIо свалат, Аллагьас ﷻ гьесде анцIго битIула», - ян. Гьанже нужго ургъеха, хириял диналъул вацал, кигIан кIудияб даражаялде нилъ щолел ругел аварагасде ﷺ кIванагIан свалат битIани. Аллагьас ﷻ нилъее тавпикъ кьеги гьеб битIизе.
РачIа, бусурбаби, гьаб соналъги лъикIаб хIадурлъи гьабилин гьеб хирияб моцIалде. Гьаб заманалда гIемерал ресал руго жинда жаниб бугеб жо къватIибе загьир гьабиялъе. Телефоназда гьарулел статусаздаса бахъараб, рукъа-бакI къачIаялде щвезегIан. Гьеб киналдаго жаниб гьабизе бегьула Бичасул аварагасул ﷺ хIакъалъулъ бугеб ракIалдещвей.
Аллагьас тавпикъ кьеги киназего! Амин!
