Хвалил пикру кIочонге

Нилъ гьаниб ракьалда гьоболлъухъ руго,
Бихьизе кьураб бакI дуниял буго.
ГьитIинал рукIарал кIудиял гIуна,
Заман ун батана расги лъачIого.

Радал рахъиналде бусеналдаса,
ХъахIал расаз нилъей рорчIами кьола.
Дур гIумрудул сонал унел ругилан
Аллагьас ракIалде щвезе гьабула.

Гьедин щола тIаде къоял лъугIараб
Абадияб сапар бухьунеб лахIзат.
Хириял хъизангун лъимал рехун тун
Рачуна Халикъас ахираталде.

Дунялалъул рокъоб щибго гIоларел,
Кинандай рукIина чIарбил гвандинир.
Аллагьас кьуралде рецц гьабуларел,
Щиб хIалдай букIина къваридаб хабалъ.

РахIманасе щукру гьабе даимго,
Такъва цIикIкIинабе ракIазда жаниб.
БетIергьан разияб гIамал гьабизе
Гъираялда хIалтIе напсазда тIад нуж.

Хириял диналъул вацалгун яцал,
РукIа цоцаздехун гьуинлъиялда.
РакI къварид гьабуге лъил бугониги,
Хвезе рижараблъи тоге кIочене.

ГIАЛИЛ ВАС МУХIАММАД ТIЕЛЕКЬ РОСУ