Дагъистан

Дагъистан

Огь Дир гIагараб ракь, тIогьол Дагъистан.
Дулъ бугеб балъголъи кинан ричIулеб?
Дун йижараб тIалъи, мугIрузул ВатIан,
Дур кIодолъиялъул кучIдул кин хъвалел?

ХъатгIанаб ракьалде ракIалъул цIайи
Кинал цIадирабаз борцине кIолеб?
Миллатал гIемераб дир ВатIаналде,
Рокьул къуват гьурщун кин бажарулеб?

Къиматал умумул бицадулъги Тун ,
БатIияб нухги ккун цее кин иней?
Къадруял улбузде рагIадги рехун,
Нухлул рагIаллъуда халккун кин чIелей?

Саяхъаб мацIалъе ихтиярги кьун,
Диналда тIанкI лъолеб кинан бицинеб?
Эбелгун инсуда ругъуналги лъун,
Рекъолареб пиша кинан гьабилеб?

Дагъистан, дир улка, дун йижараб ракь.
Дур къимат рехарал ясал дагьлъаги.
Дагъистан дир, ВатIан, цIумазул тIалъи.
Дур чIухIи бекулел васал дагьлъаги.

Хвел гьарулей гуро дун гIолилазе,
ГIадлу бокьун буго дир ракьцоязе.
Рогьо балей гуро улкацоязда,
ЛъикI рукIине бокьун кIалъалей йиго.

Дунго лъикIайилан абулей гуро,
Дийги дарслъун ккелин анищ ккун буго.
Мекъ ккезе рес гьечIин бицуней гуро,
Ккараб тIаса рехи хIажалъун буго .

ПАТIИМАТ ГIАБДУЛАЕВА