Баркала, тохтурзабазе
Щивав чиясе бокьула лъикIлъиги, адабги, гIаданлъиги. Амма киназухъаго гуро гьел хасиятал жиндилъго ругеллъун рукIине бажарулеб. Нилъго загIиплъиялде ккараб заманалда лъикIал гIадамаздаса нилъее дагьабниги кумекги гурхIелги щвани, нилъ цIакъ рохула.
РекIел унтиялъ кIвекIун чанго нухалъ дун егизе ккана Порталъулаб больницаялда. Дун йиго цIикIкIарай гIадан, гIумруялда жанир рихьана гIемерал захIмалъаби. Амма гьеб больницаялда ратарал тохтурзабаздасаги гьелъул хIалтIухъабаздасаги разиго хутIана. Аллагь разилъаги гьел киназдасаго.
«Ас-салам» казият гьоркьобккун бокьун буго дие загьир гьабизе ракI-ракIалъулаб баркала гьенир хIалтIулел тохтурзаби: ГIумаров МухIаммадхание, ГIабдуллагь МухIаммадовичасе, неврологиялъул отделалъул нухмалъулей Зарема Сиражудиновалъе, Индира Къурбановалъе, СагIидова Заирае, Калимова Фатимае.
Гьел ратана унтаразул мурад тIубазе кидаго хIадурал, яхI-намус бугел, берцинаб калам гьабулел, хIеренаб ракI батизабун рагIи абулел унго-унгоял тохтурзаби.
Аллагьас нуж, тохтурзаби, гьареги бищун лъикIаздаса. Кьеги нужее щулияб сахлъи, гъваридаб иман, кIиябго рокъоб рохелгун икъбал.
