Аллагь ﷻ разилъеги, ургъел тIаса босаралъухъ
Ассаламу гIалайкум, хIурматиял «Ас-салам» казияталъул редакциялъул хIалтIухъаби! Дие бокьун буго нужее ракI-ракIалъулаб баркала загьир гьабизе исана 15-абилеб номералда къватIибе бачIараб «Хваразе пайда цIикIкIараб» абураб макъалаялъухъ. Гьеб бихьизегIан кутакалда кIудияб ургъел букIунаан нилъедаса ратIалъаразе, хасго гIемер гIибадат-лъикIлъи гьабизе регIичIого, гIолохъанго хваразе кинаб пайда гьабилебали лъаларого.
Нилъер муршидзабаз гьабулеб, гьез малъараб къагIида нужеца бахъиялъ нижер гьеб ургъел тIаса босана. ХIатта гIадатлъун гьабун буго нижер жамагIаталъул кинав чи хваниги тагIзияталда, имамасул цевехъанлъиялда гъоркь, гьеб казияталда батараб къагIидаялда суратал жамагIаталъго цIалулеб.
Цогидазеги ракIалде щвезе букIине гьениб букIараб хъвалин: тIоцебе 100 истигъфар гьабила, хадуб 100 суратул ФатихIа, ай АлхIам цIалила. Цинги 100 суратул Ихлас, ай Къул гьува ллагьу цIалила ва 100 салатул ФатихIат цIалила. Хадубги 100 нухалда истигъфар гьабила. Гьелъул кири хварав чиясеги кьела.
Гьел суратал цIалулаго гIемераб заманги бахъуларо.
Аллагь разилъаги киназдасаго. Нилъер киналго хваразул мунагьалги чураги, чIаго ругезул рухI иманалда бахъаги, гьелде рачунеб гIамалалда даимги гьареги!
