Мунагьазул эбел
Мунагьазул эбел
Жакъа гIадамазда гьоркьоб цIакъго машгьурлъараб, чIахIиял мунагьазул цояблъун ккола хамр гьекъей. Хамр абураб рагIиялъ щвей гьабула, кинабниги гIакълу хисизабулеб жоялде, кинаб тайпаялъул гьеб батаниги.
Свалат-салам лъеяв Аварагас абулеб буго: «Кинабниги гIакълу хисизабулеб жо хамр буго, кинабниги хамрги хIарамаб буго», - ян. ТIадегIанав Аллагьас ﷻ сурату «аль Маидаталда» абулеб буго: «Ле, иман лъурал гIадамал! ХIакълъунго, кинабниги гIакълу хисизабулеб жо, лаззат щолел хIаял, хъанчал ва чIораздалъун пал тIами, щайтIаналъул гIамал буго, нуж гьездаса рикIкIалъе, Аллагьас нуж битIараб рахъалде тIоритIила», - ян. Хадубги, БетIергьанас абулеб буго: «ХIакълъунго, щайтIаналъе бокьун буго гIаракъи гьекъеялдалъун, лаззат щолел хIаял хIаялдалъун нужеда гьоркьоб тушманлъи ва ццим бахъин бекьизе, гьединго, гьелъие бокьун буго нужеда Аллагь рехсейги, как байги кIочене», - ян.
ГIемер гьекъеялдалъун гIакълу хисулеб жоялъул, цо къатIра гьекъезеги хIарамлъула. Гьекъезе кин хIарамлъулареб, гьекъолесда аскIов гIодов чIезецин шаргIалда нахъчIван бугеб мехалъ. Хирияв Аварагас ﷺ абулеб буго: «Щив чи вугониги Аллагьасдаги ﷻ, Къиямасеб къоялдаги иман лъолев, гьесда абе, мехтел тIад бугеб столалда нахъа гIодов чIоге», - ян. Цогидаб хIадисалда хирияв Аварагас ﷺ нагIана кьуна гIаракъиялда хурхен гьабурал киназего. БатIалъи гьечIо: гьеб бахъулев, босизе тукаде арав, гьелдаса хайир босулев, гьекъолесда аскIов гIодов чIарав ва гьел гурелги.
Байгьакъияс бицараб хIадисалда буго: «ГIадамазул лъабго тайпа буго Аллагьас жидер бараб какги къабул гьабуларел, лъикIаб гIамалги зобалазде борхуларел: лъутарав лагъ, жиндирго бетIергьанасухъе вуссинегIан, росасул ццим бахъарай чIужугIадан, гьев гьелдаса разилъизегIан, мехтарав чи, вигьун рукIалиде вачIинегIан», - ан.
Жинда Аллагь ﷻ разилъаяв Къатадатица бицараб хIадисалда буго: «Ункъо чи вуго жидеда алжаналъул махIцин чIваларел: цIакъго къарумав чи, мацIихъан, гIаракъи гьекъеялда тIад чIарав чи, эбел-инсуе гIакъуба кьолев чи», - ян.
Асбагьанияс хъвалеб буго: «Щив чи вугониги мехтун вукIаго дунялалдаса ватIалъарав, гьев хабалъеги мехтун лъугьуна, къиямасеб къоялъ хабалъа къватIивеги мехтун вахъуна. Цинги, Аллагьас амру гьабула гьев жужахIалъуве рехеян». Абугьурайратица бицараб хIадисалда буго: «Инсанас зина гьабулеб мехалъ, гьес гьеб гьабуларо рекIелъ иманги букIун, гIаракъи гьекъолеб мехалъ, гьеб гьекъоларо рекIелъ иманги букIун, цIогьорас бикъа-хъами гьабулеб мехалъ, гьеб гьабуларо, рекIелъ иманги букIун», - ан. Гьелъул магIна ккола гьал мунагьал гьарулеб мехалъ, Аллагьас ﷻ гьесул рекIелъа иман нахъе босулин ва гьеб хIалалда Аллагьасул ﷻ къадар щвани, хвалда мекъи ккеялда хIинкъи бугин абураб.
Аллагьас ﷻ тавпикъ кьеги къабихIаб мунагьалдаса рикIкIалъизе.
