Сабру тIагIин буго балагь
Кинаб бугониги балагь бачIиндал, нилъеда ракIалде ккола гьабунщинаб гIадада хванин, дица щиб гьабилебин абун, сабру тIагIуна.
Гьеб буго мекъаб пикру, гьединаб лъугьа-бахъиналда сабру гьабун чIезе ккола. Сабру гьабиялъулъ буго инсанасул къуват, бусурбанчиясул иман. Балагь бачIиндал, гьелъ ракI бакъвазабун гIодунин абун щибго къварилъи гьечIо, ракIалдалъун нилъ Аллагь ﷻ разияб нухда ругебгIан мехалъ. Аварагас ﷺ абураб кинниги: «Берал гIодула, ракI къварилъула амма нилъеца гIицIго Аллагь ﷻ разияб калам гьабила», - ян.
Гьединаб лъугьа-бахъин ккедал Аллагьасулгун ﷻ хурхен щулаго ккун, хIукмуялда разилъун, Аварагас ﷺ малъаралда нахъ рилъун чIела.
Аварагас ﷺ абулаанин абун Абу-Гьурайратидасан Тирмизияс бицана: «Бусурбабазде, гьезул боцIи-малалде, наслуялде тIаде рачIунел хIалбихьиял къотIуларо, гьез Аллагьасда ﷻ мунагьаздаса рацIцIадаллъун дандчIвай гьабизегIан».
«Лагъасе лъикIлъи бокьидал Аллагьас ﷻ гьесие гьанибго гIакъуба гьабула, квешлъи бокьидал - Къиямасеб къоялде нахъбахъунги тола».
