Магниталъулаб полеялъул гьаракь хъвана
ЦебетIураб техника сабаблъун жакъа инсанасухъа бажарула батIи-батIиял гIелмиял жал рагьизе. Амма гьаб заманалда космос тIубанго квегъизе ва лъазабизе бажаруларо. Гьеб кутакалда кIудияб бакI бугелъулха, нилъеда гьелъул хIакъалъулъ бицинецин хIалги кIоларо.
Дагьаб цебегIан Даниялъул техникияб университеталъул гIалимзабазухъа бажарун буго дунялалъул магниталъулаб полеялъул къиркъидулеб гьаракь хасаб алаталде хъвазе.
Гьез ичIго соналъ лъазабун буго гьеб гIелму. Гьеб лъазабизелъун тIадгьаваялде биччан букIана лъабго батIияб спутникги. Гьез дунялалъул ядроялъул гьаракь гуребги, мантиялъулги океаназулги гьаракь хъвалеб букIана.
Гьелъул гьаракь релълъуна маххуда тIад ганчIал речIчIулеб гIадинаб гьаркьида. ГIенеккизе бокьараз интернеталдаса гIинтIамизеги бегьула. Гьединаб гьаракь гьелъул букIиналъул хIакъалъулъ аварагасги ﷺ баян гьабун букIана.
ТIабаранияс бицараб хIадисалда буго: «РагIулеб бугищ нужеда дида рагIулеб гьаракь? Дида рагIулеб буго зодосан гьаракь, гьелда гIайибчIвазе бегьуларо. Щайин абуни, гьениб рокьогIанасеб бакI гьечIо малаикзабаз Аллагьасе ﷻ тIагIат гьабулареб», - ян («МугIжабул Кабир»).
