Баркула кIалбиччаялъул байрам

ДРялъул муфти, ГIалимазул советалъул председатель, шайх АхIмад-афандияс улкаялъул бусурбабазда баркана тIаде щвараб КIалбиччанкъоялъул хирияб байрам.

Ассаламу гIалайкум ва рахIматуллагьи ва баракатугьу! Хириял диналъул вацалги яцалги!

ТIадегIанав Аллагьасе рецц буго, гьаб кIудияб рохелалъул гьайбатаб асаргун нужеде саламалъул хитIаб гьабизе рес дие кьуралъухъ.

ТIаде щвараб байрам баркулаго, абизе бокьун буго нужеда: АлхIамдулиллагь, тIолго рецц гьаб дунял бижарав Халикъасе, Рамазан моцI бихьизеги, гьеб моцIалъ бажарараб гIибадат гьабизеги ва КIалбиччаялъул гIид – ГIидул-Фитр – кIодо гьабизеги гьелдаса рохизеги нилъее рес кьуралъухъ.

Гьелдаго цадахъ, дица Аллагьасе рецц гьабула, киналго цадахъ ракIарун, ифтарал тIоритIизеги, садакъа гьабизеги, таравихIал разеги нилъее рес кьуралъухъ.

ЦIакъ кIудияб кIвар бугеблъун буго ТIадегIанасе цогидал рахIматазухъги рецц гьаби, щайгурелъул дагьалъ цереккунцин гьединал лъикIлъабазул гIемерисездаса циндаго махIрумлъун рукIиндал нилъ.

Гьединго, дир гьари буго нужеде: щибаб къойил Аллагьасе рецц гьабиялда цадахъго, кIочонге баракатал ишал гьаризеги ва Рамазан моцIалда ругьунлъараб къагIидаялда гIибадаталда чIезеги – цIале Къуръан, кумек гьабе гIагабожаразе, садакъа гьабе ва гь.ц.

Дица рахIму-цIоб гIатIидав РахIимасда гьарула, Аллагьасе рихарал ишаздаса рикIкIалъизеги Гьесие хириял гIамалазда даимлъизеги киназего къуватги сабруги кьеян абун, щайгурелъул байрам кIодо гьабиялъул аслияб магIна букIуна ТIадегIанасул диналда рекъон хьвади ва Гьесул ццим бахъиналдаса хвасарлъи.

КIал кквеялъухъ тIадегIанаб даражаялъе мустахIикълъула гIицIго Аллагьасукьа хIинкъиялдалъунги, гьаб дунялалъул ихтилат-кепалдаса рикIкIалъиялдалъунги, нафсалде данде къеркьеялдалъунги. Щайгурелъул унго-унгояб талихI кьола гIицIго Хирияб Къуръаналдаги Аварагасул суннаталдаги рекъон гIумру гьабулев инсанасе.

ХIурматиял диналъул вацалги яцалги, дица Аллагьасда ракIракIалъ гьарула нилъер лъикIал щинал гIамалалги, Рамазан моцIалъ гьарурал баракатал ишалги, ккурал кIалалгун бахъараб закагIатгун сахIги ва бацIцIадаб нигатгун гьабураб кинабго жо къабул гьабеян абун.

Аллагьас азариде даража бахинабеги нужер гьелъул ва нужеда цадахъго – бацIцIадаб нигат гьабуразул ва батIи-батIиял гIиллаби сабаблъун, нигаталда рекъон кколеб гIамал гьабун бажаричIезулги.

Гьарула нужее киназего Халикъасул рахIматалги, сахлъиги, баракатги ва кIиябго рукъалъул битIккейги. Амин».