Баркула Къурбаналъул гIид
Дагъистаналъул муфти, ГIалимзабазул советалъул председатель, шайих АхIмад-афандица тIолалго бусурбабазда баркана Къурбанкъоялъул гIид.
Баркиялда хъвалеб буго:
«ХIурматиял вацал ва яцал! Аллагьасе рецц буго жакъасеб къо бихьизе ва тIаде щолеб бугеб бусурбабазул бищун кIудиязул цояб - Къурбанкъоялдаса рохизе нилъее рес кьуралъухъ. Киналго бусурбабазе кIвар цIикIкIарал гьал къоял цере чIола рахIмугун, рекIел гурхIелгун, цогидазе кумек гьабизе бугеб гъирагун, гьединго Аллагьасде бугеб гIурхъи гьечIеб мутIигIлъигун.
Гьеб кинабго чиясул рекIелъан къватIибе кинго загьирлъичIогоги хутIуларо. Гьал къоязда дунялалда тIолалго бусурбабаз къурбан хъола, гьебги ккола диналде бугеб ракI бацIцIадаб мутIигIлъи бихьизабиялъе хIужжа.
Къурбанкъоялъул гIидалъ бусурбаби цолъизарула. Гьезулъ куцала Къурбаналъул тарихалдехун бугеб хIурматияб бербалагьи гуребги, цоцаздехун букIине рекъараб хIеренаб ва лъикIаб гьоркьоблъиги. Гьеб къоялъ бусурбабаз хъола къурбан, баркула ва уна цоцахъе гьоболлъухъ, бикьула садакъа.
Цогидаб жо рикIкIинчIого, Къурбанкъо ккола хIеж лъугIиялъул байрамги. Исана коронавирусалъул пандемиялъ бусурбабазе (КСАялъул хутIун) щвечIо исламалъул щуабилеб рукну тIубазабизе. Кин бугониги, гьарула Аллагьасда нилъер халкъалъе гьаб унтиялъул балагьалдаса цIуниги унтаразе сахлъиги. Киназулго хъураб Къурбанги гьабураб садакъаги къабул гьабеги.
