Къурбаналъул гIид

Дагъистаналъул муфти, шайих АхIмад-афандица, тIолалго бусурбабазда баркана тIаде щолеб бугеб Къурбаналъул гIид

ХIурматиял диналъул вацал ва яцал! Къурбаналъул гIид ккола бусурбабазул бищунго хирияб ва кIудияб байрам. Щибаб санайил гьеб байрамалъухъ урхъун ралагьун чIунги рукIуна дунялалъулго бусурбаби. Щайгурелъул, гьеб кколелъулха нилъ киналго цолъизарулеб, цоцазе кумек гьабулеб, ракIал хIеккинарулеб байрам.

Адамил лъималаз гьабизе бищунго БетIергьанасе бокьулеб гIамалги буго къурбаналъе жо хъвей. Хирияб хIадисалда буго: «Къурбан къоялъ Адамил лъималаз гьарурал лъикIал гIамалазул бищун Аллагьасе бокьулеб гIамал би гIодобе тIей, ай къурбан хъвей буго», - ян.

Гьединго Аллагьасе рецц буго, цересел соназго гIадин, исана миллионал бусурбабазе хIежалде ине рес кьуралъухъги. Гьел Маккаялдегун Мадинаялде щвезе ва бусурбанчиясда тIадаб рукну тIубазе санагIалъи щваралъухъ.  Аллагьас къабул гьабеги гьез борхараб хIеж, хъураб къурбан ва гьабунщинаб гIибадат.

ГIидалъул къоязин абуни нилъеца хIаракат бахъула лъикIабщинаб гьабизе, садакъа кьезе, мискин-пакъирасда кверчIвазе ва бищунго аслияб жо – БетIергьанасул разилъи тIалаб гьабизе.  Аллагьас къурбан хъвей шаргIалда бихьизабиялдалъун нилъер иманалъул хIалбихьулеб ва мискинзабазе кумек гьабизе нилъ гьесизарулел руго. Гьеб къоялъ бусурбабазул, хасго гIага-божаразул ракIазулъе рохел лъугьинабизе, мискин-пакъирасухъе кумекалъулаб квер бегьизе тавпикъ кьеги Аллагьас ﷻ нилъее. Дагъистанги тIолабго Россияги цIунун хутIаги питнабаздаса, балагьаздаса, рагъ-кьалаздаса. Аллагьас нужер киназулго гьабураб лъикIаб гIамалги къабул гьабеги.