КӀал биччаялъул байрам
Ассаламу гIалайкум ва рахIматуллагьи ва баракатугьу!
ХIурматиял диналъул вацал ва яцал! РакӀ-ракӀалъ баркула нужеда тӀаде щвараб баракатаб кӀал биччаялъул байрам: кӀал кквеялъул, как баялъул, ракӀбацӀцӀадаб тавбуялъул ва рухӀияб рахъалъ хисиялъул цӀураб хирияб рамазан моцӀ лъугӀулеб къо.
Гьеб байрамалъ цоги нухалда ракӀалде щвезабула исламалъул къимат: гурхӀел-рахӀму, цоцазе квербакъи, цолъи, мадугьаласул ургъел гьаби. Хъизамалъулгун бухьенал щула гьаре, къварилъиялда ругезул хӀисаб гьабе ва цогидазе рохел бикье. Щайгурелъул, гьеб кколелъулха байрамалъул хӀакъикъияб магӀна.
Гьеб къоялъ дицаги дугӀа гьабула хасаб рагъулаб операциялъул зоналда ругел, хъизан-лъималаздаса ва гӀагарлъиялдаса рикӀкӀад хутIарал нилъер вацазегун яцазе. ТӀадегӀанав Аллагьас ﷻ гьезул къвакIигун-яхI щула гьабеги, гьезие сахлъи кьеги, гӀумру цӀунаги. ТӀадегӀанас ﷻ нилъги гьаб ракьалда парахатго таги.
Гьарула Аллагьасда ﷻ нилъер ккурал кӀалалги, гьарурал лъикӀал гIамалалги, дугӀабиги къабул гьареян, хӀакъаб нухда рукIине къуват кьегиян, БетIергьанасул ﷻ гӀурхъи гьечӀеб рахӀматалъухъ ракӀазулъ шукру цӀикӀкӀинабегиян.
Баракат ва рохел гьарзалъаги нилъее кӀалбиччанкъоялъ. Нилъер цолъи щула гьабеги, ритӀухълъиялде, цоцазул адаб-хӀурматалде, вацлъиялъулаб рокьиялде рачаги нилъ киналго.
Баркула нужеда байрам! ТӀадегӀанав Аллагьасул ﷻ рахӀмат ва баракат лъеги киназдаго.
