Кумекалъухъ баркала
Ассаламу гIалайкум, хирияб «Ас-салам» газеталъул редакция. «Вотцапалъул» цо къокъаялда бихьана ГIиса аварагасул цIаралда балеб бугеб РухIияб централде рачIарал чагIазе экскурсия гьабулеб. Ма ша Аллагь, гьениб кIудиял хIалтIаби гьарун ругоан.
Цебе кьучI лъолеб мехалдаго ресалда рекъараб нижецаги гьабулаан. Гьеб видео бихьаралдаса гъира ккана бажарараб кумек гьабизе ва гьеб пикру загьир гьабуна вацасул ясаздеги. Дир пикруялда гьел разилъана ва жидерго ресалда рекъараб бакIарун, ниж РухIияб централде щвана. Ниж ккола Шамил районалъул ТIаса Колоб росулъа, Ленинкенталда гIумру гьабулел Рамазанов Сулейманил хъизан.
Нижер хъизамалъул чIахIиязул эбел-эменги ункъавго вацги хвана, руго гьезул лъимал. Дие бокьун буго вацазул ясазе аза-азар баркала загьир гьабизе ва, дир пикруги къабул гьабун, ракIалда букIараб мурадалде бахъинабурал гьезие гьаризе чорхое сахлъи, лъимал-хъизамаздаса рохун хутIи. Аллагьас нужер садакъа лъимал-хъизамазде бачIунеб балагьалда цебе чIаги, хварал эбел-инсул рухIазе щваги, баракатаб боцIи дандчIваялъе сабаблъун ккаги.
АЛИПАТ
