ЦIунтIа районалде ана кубок
ЦIунтIа районалде ана кубок
Дагъистаналъул муфтияталъ Шамилхъалаялда тIобитIана мугIрузулаб территориалияб округалъул лъагIалил хIисабкьей. Данделъиялде рачIун рукIана 17 районалдаса «Инсан» фондалъул, «Ас-салам» газеталъул, давгIаталъул отделалъул, гIолилазул гIуцIиялъул вакилзаби, мажгитазул имамзаби ва цогидалги.
КIалъазе рахъарал ГIалиасхIаб-хIажи Разакъовас, Рамазан-хIажи Жаватхановас, АхIмад-хIажи ГIабдурашидовас, МухIаммадсултIан-хIажи ГIабдулаевас, ХIажимурад ГIабдуразакъовас ва цогидазги бицана 2023 соналъ жидецаго гьабураб хIалтIул хIакъалъулъ. Киназулго кIалъаялъул аслияб магIна букIана: нилъер къуват, цебетIей цолъун, цадахъ хIалтIиялъулъ бугилан абураб. ЦIакъго лъикI хIалтIаразе муфтияталъул рахъалдасан Баркалаялъул кагъталги кьуна. Гьеб щвана Унсоколо районалдаса «Инсан» фондалъул хIалтIухъан ГIайшат Залибековалъеги.
«Инсан» фондалъул хьвадулеб кубок ЦIунтIа районалде ана. КIиабилеб ва лъабабилел бакIал Гъуниб ва ЧIарада районазе щвана.
Мажлис берцин гьабун букIана гьоркьо-гьоркьоб Унсоколоса МухIаммад-хIажица ахIулеб мавлидалъги ясли-ахалъул ва школлъималазул церерахъиназги.
КIалъазе вахъарав «Инсан» фондалъул генералияв директор МухIаммадрасул МухIаммадовас ракI-ракIалъулаб баркала загьир гьабуна мажлисалъул гIахьалчагIазе ва ахIана хадурккунги цолъун, цадахъ рекъон хIалтIизе.
