Нухазда рацIцIалъи чIезабулев
ХIурматияб «Ас-салам» газеталъул редакция! Газета гьоркьобккун нижее, Шамил районалъул ТIаса Колоб росдал гIадамазе, бокьун буго баркалаялъул калам загьир гьабизе Микьигьориса ХIасанил МухIаммадие.
МухIаммадица тIаде босун буго нижер росабалъе рачIунел нухазул тIалаб-агъаз гьабиялъул иш. Гьев гIемер вачIуна нухде ва бажарараб гьабула квалквал букIунаредухъ нухал чIезаризе.
Щибаб къойил нилъерго ишазде машгъуллъун рукIиналъ нилъеда къанагIат гурони бихьуларо гьединал гIадамазул хIалтIи. Амма, гьезул кумекалдалъун, нилъер нухал хутIулел руго лъикIаб хIалалда, бокьараб гьава-бакъалда машина хьвадизе бегьулеллъун.
Хасаб кIвар буссинабизеги бокьун буго МухIаммадица жиндирго хIалтIи рецц-бакъалъухъ гуреб, ракI-ракIалъ гьабулеб букIиналдеги. Нилъер диналъги хасаб кIвар гьабула гIадамазе пайдаялъе хIалтIи гьабиялде, нухал къачIаялде, рацIцIа-ракъалъи цIуниялде. «ГIадамазе зарал гьабулеб жо нухдаса нахъе рехиги ккола иманалдаса», - ян абун бугелъулха Аварагасги ﷺ.
Гьарула МухIаммадие щулияб сахлъи, сабру, захIматаб, амма кIвар бугеб хIалтIулъ хадубккунги икъбал, Аллагьасул ﷻ кумек!
ТIадегIанав Аллагьас ﷻ гьесул хIаракат бигьа гьабеги, БетIергьанас кирилъунги хъван батаги.
