Чакаразул МухIаммад

ГьентIа росдал гIадамазул биценалда рекъон, Чакаразул Мухlаммад вукlун вуго бергьараб лъаялъул гlалим. Гьев сабурав инсанги вукlун вуго. Гьес тlадчlей гьабулеб букlун буго лъималазда Къуръан малъиялда.

Гьесдасан гlелму щун буго нахъа тlарикъаталъул устарзабилъун рахъарал Лъахъа Хlамзат-афандиясеги (къ.с.), Тlидиса Ибрагьимхалил Мухlаммад-хlафизафандиясеги (къ.с.) ва цогидалги гlалимзабазе. Цо заманалда гьев вукlун вуго Гьидерил бодул къадилъунги, Гъоркьагlурада росдал дибирлъунги. Гьенив хlалтlулаго гьесде тlаделъун рукlун руго дибирлъиги тун дурго росулъе аян. Пуланав чияс мацlги гьабун, цlаларав чийинги абун, Къахlиса Хlасан-афандигун (къ.с.) цадахъ вачун ун вуго гьев ва араб рахъ-мухъ лъачlого тlагlун вуго.

Мухlаммадил чlужу Патlина хведал гьей тlойитlизе Гьентlе вачlун вукlун вуго Тlидиса Ибрагьимхалил Мухlаммад-хlафиз-афанди (къ.с.). Гьелъул жаназа хабалъ рекъезабулаго, ток кьабурав чи гlадинги лъугьун, гьев хабалъа къватlиве вачlун, гlодов чlола ва бадиса магlу чваххула. Гьеб бихьараз абула щибин ккарабилан абун. Гьеб мехалда гьес абула: «Гьай мунагьал чураялъ диде васият гьабун букlана жий тlойитlейин, амма гьелъул росас гьей дихъа нахъе ячун ана, гьеб мехалъ ракl къварилъичlого хутlичlоха», - ян. Чакаразул Мухlаммадил гlагарлъи буго Гlурада росулъги.