Ахират лъикIаб кьун батаги
Шамил районалъул ГIуриб росулъа ПатIимат ХIасанхIусеновалъ гIумру гьабулеб букIана МахIачхъалаялда, жиндирго ясалда аскIоб. ПатIиматица исана тIубалаан 101 сон. Гьелъул микьго лъимерги хвана. Гьелъ бесдал хутIарал лъималазда кверги чIвана. Гьел хварал лъималазул хутIарал какалгун кIалалги ПатIиматица рецIулел рукIана.
45 соналъ ккуна ПатIиматица кIал, гIицIго гIидалъул къояз гурони биччачIого. Исана 9 апрелалда гьей Аллагьасул къадаралде щвана.
Дие ва дун хIалтIулеб коллективалъул рахъалдасан бокьун буго ПатIиматил яс Нуцалалдаги гьелъул гIагарлъиялдаги зигара базе.
Аллагьас иманалда тIойитIун ятаги гьей лъикIай гIадан.
Эбел хведал ясалъ хъван руго гьадинал рагIаби:
Эбел, мун къанщараб ичIабилеб къо,
Къадги бецIлъун ккана дие дуниял.
Къилбаялде юссун рухI босулелъул,
Бараб черхалда цIа чучичIо жеги.
Мунагьал чураяй, черх бацIцIалъаяй,
Чанги инагьдила ниж дуда хадур.
Алжан кьун йохаяй, ахират щваяй,
Инаро кидаго мун ракIалдаса.
