Ч|арада

Школалде сапар

Арчиб росдал гьоркьохъеб школалъул учительзаби ва цIалдохъабигун дандчIвана ДРялъул Муфтияталъул лъай кьеялъул отделалъул ЧIарада районалда вугев вакил ШагIбан Хапизов ва «Ас-салам» газеталъул районалда вугев представитель МухIаммад МухIаммадов.

Абу ХIанифаца (р. гI) абулаан хIакъикъаталдаги, дие лъай щвана, Аллагьасе реццгун шукру гьабиялдалъун. ЦIияб гIелму лъараб яги бичIчIараб мехалъ гьелъухъ ТIадегIанав Аллагьасе дица шукру гигьабулаанин бицана данделъиялда.

ГЪУНИБ

СалтIа росдал гьоркьохъеб школалда

Гьал къоязда ДРялъул Муфтияталъул лъай кьеялъул отделалъул Гъуниб районалда вугев вакил ГIалиасхIаб Разакъов щвана СалтIа росдал гьоркьохъеб школалде. Гьев дандчIвана школалъул директор МухIамадтIагьир ГIабасовгун.

ДанчIваялда бицана школалда дандчIвалел масъалабазулги ва цадахъаб хIаракаталдалъун гьел тIуразариялъе нухал ратиялъулги. Гьелдаса хадуб ГIалиасхIаб Разакъовас цIалдохъабазе бицана хирияб Рамазан моцIалъул тIокIлъиялъул хIакъалъулъги.

ШАМИЛ

Гъоркьа Бакълъухъ росулъ къец тIобитIана

ТIоцебесеб маялда Гъоркьа Бакълъухъ росулъ гьаруна какие чуриялъулги как баялъулги низам цIуниялъул мурадалда тIобитIараб къецалъул хIасилал.

Гьеб тадбиралда гIахьаллъана Шамил районалъул Имамзабазул советалъул председателасул кумекчи Аюб ЗайнулгIабидовги, Гъоркьа Бакълъухъ росдал мажгиталъул имам МухIамад ГIумаровги, рехсараб росдал бегавул МухIаммад ХIажиевгун цогидалги.

Къецалда гIахьаллъана мадрасалъул цIалдохъаби. Гьелда чIел босаразе кьуна гIарацги къиматал сайгъаталги.

ГЪИЗЛЯР

ДРялъул Муфтияталъул лъай кьеялъул отделалъул Гъизляр районалда вугев вакил МахIмуд Хизриев дандчIвана Кордоновка ва Некрасовка росабазул школазул цIалдохъабигун.

ДандчIваязда бицана гьанже заманалда жамгIияталда тIиритIарал мунагьиял ишазул ва гьездаса цIуниялъе гьаризе тIадал тадбиразул хIакъалъулъ. «Мунагьал ккола рекIелъа иман бачахъулел ва дагьдагьккун ракI кваналел заралиял пишабигун ишал.

Гьелъие нух ккола нилъеца, напс цебе, гIакълу нахъе гьабулеб бугони, ай рекIее бокьараб щинаб жо щвезабиялъул мурад аслияблъун толеб мехалда. Цогидазе кколеб заралги хIисабалде босуларо. Амма бищунго захIматаб жо буго, мунагьаз нилъеего, ай мунагь гьабулесе, жеги цIикIкIараб зарал гьабулеблъи кIочон тей», - ян бицана МахIмуд Хизриевас

ЛЪАРАТIА

ТIохIотIа росдал гьоркьохъеб школалда накъит

Гьал къоязда рехсараб школалъул цIалдохъабазе бицана наркотикалъул заралъул хIакъалъулъ. Накъиталдаса хадуб цIалдохъабазги диниял хIаракатчагIазги школалъул ахикь чIана «Гьудуллъиялъул гъветI».

УНСОКОЛО

Улбузул дандеруссин

Шамилхъала поселокалъул гьоркьохъеб школалда тIобитIана цIалдохъабазул улбузул дандеруссин. Гьелда гIахьаллъана ДРялъул Муфтияталъул лъай кьеялъул отделалъул Унсоколо районалда вугев вакил МухIамадсултIан ГIабдуллаевги, хIинкъи гьечIолъи цIуниялъул рахъалъ Унсоколо районалъул бетIерасул заместитель МухIамад ХIамзатовги, РФялъул МВДялъул Унсоколо районалда бугеб отделалъул балугълъиялде рахинчIезул ишазул рахъалъ инспектор, полициялъул лейтенант ХIажимурад ХIасановги, Шамилхъала посёлокалъул бегавул МалахIусен ХIажиевги.

Дандеруссиналъул аслияб мурад букIана гIолеб гIелалъе тарбия кьей, экстремизмалдегун терроризмалде дандечIей куцай, наркотиказул заралъул хIакъалъулъ бицин. Гьел руго жакъа къоялда квешлъиялде данде къеркьезе лъайгун къуват гIолареб гIелалда хъинтIулел ва чарагьечIого тIуразаризе кколел масъалаби.

БОЛЪИХЪ

КIижани росдал гIолилалгун дандчIвай

ДРялъул Муфтияталъул лъай кьеялъул отделалъул Болъихъ районалда вугев вакил ИсмагIил Ибрагьимовас накъит гьабуна КIижани росдал гьоркьохъеб школалъул цIалдохъабазулгун.

Гьениб бицана социалиял гьиназул пайдаялъулги заралалъулги хIакъалъулъ. И. Ибрагьимовас аслияб кIвар буссинабуна социалиял гьиназул заралалде. ЦIалдохъабаз кьурал суалазе жавабалги кьуна ахиралда.

ГIАХЬВАХЪ

Меценатасе баркала

ДРялъул Муфтияталъул лъай кьеялъул отделалъул ГIахьвахъ районалда вугев вакил ГIабдуллагь Мажудиновги, районалъул Имамзабазул советалъул председателасул кумекчи Шамсудин Шамсудиновги ва «Инсан» фондалъул ГIахвахъ районалда вугев вакил ГIабдусалам ГIабдуллаевги гьоболлъухъ щвана меценат МухIаммад МуртазагIалиевасухъе.

ГI. Мажудиновас меценатасе кьуна гьитIинабго сайгъат ва загьир гьабуна халкъалъе гьабулеб кумекалъухъ баркала. М. МуртазагIалиевас абуна, районалъул гIадамазе кумекалъе жив хIадурав вугин ва загьир гьабуна жиндир ишалде кIвар кьеялъухъ рохелги.