Россиялъул гIолохъанал гIалимзаби
Гьал къоязда МахIачхъала шагьаралда, Му-хIаммадгIариф-афандиясул цIаралда бугеб Дагъистаналъул исламияб университеталда, тIобитIана «Россиялъул гIолохъанал гIалимал» абураб цIаралда гъоркь гIолилазда гьоркьор гIелмиял къецал. Лъай борциналъул бахIсалда рукIана шафигIиябгун хIанафияб фикъгьи, усулул фикъгьи, гIакъида лъазабулел.
ГIелмияб хIалбихьиялда гIахьаллъи гьабуна 25-гIанасев гIолилас. Дагъистаналдаса гуребги гьеб бахун къватIисаги вакилзаби рачIун рукIана гьенире.
ХIалуцарал къецазул хIасилалда финалалде ворчIана микьго тIалиб. Гьезул тIоцебесеб бакI ккурасе бихьизабун букIана Chevrolet Monza абураб машина.
ГIелмиял бахIсазул хIасил гьабулеб мажлис берцин гьабуна Дагъистаналъул муфти, шайих АхIмад-афандияс гIахьаллъи гьабиялдалъун. Данделъиялда гIахьаллъи гьабуна Башкортостаналъул, Новосибирск областалъул муфтиязгун цогидалги регионазул диниял церехъабаз. Гьебго мажлисалда вукIана Бичасул аварагасул ﷺ наслуялъул гIалим ХIабиб ХIусейн Ас-Сакъаф, дунялалъулго диниял хIаракатазул советалъул секретарь МухIаммад Джума ал-Бишарий.
Мажлисалда кIалъана Башкортостаналъул муфти, Дагъистаналъул муфтиясул наибзаби ва гьалбал.
Мажлисалъул ахиралда кIалъазе вахъарав Дагъистаналъул муфти, шайих АхIмад-афандияс тасаввуфалъул бицунаго абуна, тIарикъаталъул гIадамал кколин чорхолъ ругел рухIиял унтаби сах гьариялда тIад хIалтIулел ругел гIадамалин абун. КIудияб баркала загьир гьабуна тIаде рачIарал гьалбадерие. ТIоцебесеб бакI ккурав гIолохъанав гIалим, МухIаммадгIариф-афандиясул цIаралда бугеб Дагъистаналъул исламияб университеталъул тIалиб МухIаммадзакир Идрисовасе сайгъат гьабуна машинаги.
КIиабилеб бакIалъе мустахIикълъана гьебго университеталъул тIалиб Шамил Багъатаров. Лъабабилеб бакIалде вачIана ДИУялъул аспирант АхIмад ГIисахIажиев. Ункъабилеб бакI босана Гъизилюрталда бугеб ДИУялъул филиалалъул тIалиб Шамил Батирмирзаевас. Щуабилеб бакIалъе мустахIикълъана Унсоколо росулъ бугеб ДИУялъул филиалалъул тIалиб Сайпудинов МухIаммад. Анлъабилеб бакI ккуна Хасавюрт шагьаралда, СагIибдег Даитовасул цIаралда бугеб, исламияб университеталъул тIалиб ГIабдуллагь Билаловас. Анкьабилеб бакI – Хасавюрталда, А. Юсуповасул цIаралда бугеб мадрасалъул тIалибасе щвана. Микьабилеб бакIалде вачIана гьебго мадрасалдаса АбутIалиб Батирмизаев.
ГIабдуллагь МухIаммадов
