«ГIолохъанав теологасул школа»
«ГIолохъанав теологасул школа»
Дагъистаналда бугеб «Каспий» санаториялъул базаялда тIобитIана «Школа молодого теолога» абураб цIаралда гъоркь Халкъазда гьоркьосеб гIолилазул форум рагьиялъул тадбир.
Гьеб гIуцIун букIана Дагъистаналъул гуманитарияб институталъ, лъай кьеялъулгун гIелмуялъул ва исламияб культураялъул фондалъул кумекалдалъун.
Форумалда гIахьаллъи гьабуна пачалихъияб власталъул вакилзабаз, диниял ва жамгIиял гIуцIабазул церехъабаз, гIелмияб интеллигенциялъ ва СМИязул хIалтIухъабаз.
Форумалда гIахьаллъана Москваялдаса, Орелалдаса, Саратовалдаса, Краснодаралдаса, Ставрополалдаса, Татарстаналдаса, Вологдаялдаса, Ульяновскиялдаса ва цо-цо къватIисел улкабаздаса 120-гIанасев чи.
КIалъазе вахъарав ДРялъул миллияб политикаялъул ва диниял ишазул рахъалъ министр Энрик Муслимовас, киназего саламги кьун, абуна: «Нилъер ракI унтизе ккола гIолеб гIелалда хадуб. Гьел битIараб нухде ккезариги буго нилъеда тIадаб иш. Теологиялъул хIакъалъулъ абуни, жакъа гьеб буго бищун кIвар бугеб профессия. Теологасда лъазе ккола гIемераб жо ва гьев вукIине ккола сундулъго цеветIуравлъун», - ян.
Республикаялъул муфтияталъул председатель ГIабдула Салимовас бицана цо-цояз цIакъ хIаракат бахъулеб бугин нилъер улкаялда терроризмалъулгун экстремизмалъул идеяби рилълъанхъизариялъул мурадалда, динги гьоркьобккун, хIалтIи гьабизе.
«Хасго гьеб къагIида загьирлъана СВО байбихьаралдаса. Амма нилъер масъала буго гьединал ишаздаса ва гIадамаздаса нилъерго дин цIуни, хасго гIолохъабазул лъайги хIалтIизабун. Гьеб ишалъулъ нилъ нахъе къан чIезеги бегьуларо», - ян кIалъана ГIабдула Салимов.
