Форумалъе ахир лъуна
«Каспий» санаториялда тIобитIана Халкъаздагун диназда гьоркьосеб гIолилазул XII форум.
Гьелъул хIасил гьабиялъулаб тадбиралда кIалъарав ДРялъул миллияб политикаялъул ва диниял ишазул рахъалъ министрасул заместитель Рафик Ханзаровас бицана форум цIакъ пайдаяб куцалда анин ва тIаде-тIадеялъулги жеги лъикI тIобитIизе Аллагьас щивасе къуват кьегийин абун.
«Гьаб форум гIицIго цо хасаб тадбирлъун гуреб, унго-унгояб гьудуллъиялъулаб, цоцазда ричIчIиялъулаб байрамлъун лъугьана», - ян абуна министрасул заместителас.
Гьес бицухъе, форумалда, аслияб куцалда, кIвар буссинабуна терроризмалдегун экстремизмалде данде къеркьеялъулаб хIалтIи гьабиялде. Гьеб кколелъулха жакъа жамгIияталъе бищун цIикIкIараб хIинкъи бугеб «унтилъун».
Дагъистаналъул муфтияталъул цIаралдасан кIалъарав лъай кьеялъул отделалъул нухмалъулев АхIмад ХъахIаевас абуна:
«Гьаб иргадулаб форумалъ цоги нухалда бихьизабуна диназда гьоркьоб кинаб букIаниги дандеккунгутIи, цоцазда ричIчIунгутIи гьечIеблъи ва нилъер жамгIияталда жаниб питна бекьизе бокьарал мурадалде щолареблъи. Цадахъ ругони, нилъ лъидаго къезаризе кIвезе гьечIо», - ян абуна А. ХъахIаевас.
