ДГИялъул лекторас цӀунана докторлъиялъул диссертация

Болгариялъул исламияб академиялда тӀобитӀана исламиял гӀелмабазул докторлъиялъул даражаялъе диссертациял цӀуниялъул тадбир. Дагъистаналъул гуманитарияб институталъул кӀудияв преподаватель МухӀамад Шагьрудиновасги бергьенлъиялда цӀунана диссертация ва гьесие кьуна исламиял гӀелмабазул доктор абураб цӀар. Гьесул цӀех-рехалъул тема букӀана «Богословско-правовой анализ современного российского фетвотворчества» абураб. Гьесул нухмалъулевлъун вукӀана Болгариялъул Исламияб академиялъул исламиял гӀелмабазул доктор ва диниялгун гуманитариял дисциплинабазул кафедраялъул доцент аль-ГIасри Саиф ГӀали.

Гьеб цӀех-рехалъул кIвар буголъи хурхараб букӀана Россиялда бусурбабазул къадар гӀемерго цӀикӀкӀиналда, гьелдаго цадахъ улкаялъул исламияб жамгӀияталда теологиялъулгун юридикиял интерпретациязул къадар гӀатӀилъулеб букӀиналда. Гьел ишаз рагьизе бегьула батӀи-батӀиял багъа-башариязда гьоркьор теологиялги жамгӀиялги бахӀсал, гьединго, цогидал диназул вакилзабазда гьоркьоб бичӀчӀунгутӀи лъугIизабиялъе гьабула квербакъи.