Аварагасул асарал ЦIумада районалда
Аварагасул асарал ЦIумада районалда
ХIасан МухIаммадов, Агъвали росу
Аварагасул асарал рихьизе тIоцебесеб нухалъ вачIана. БитIараб бицIани, гьал асарал гьанире щвелилан ракIалде ккунцин букIинчIо. Аллагьасе щукру буго гьадинаб рес кьун нилъ тарав. Гьел рихьидал черхалъе гьабураб асар гIезегIан лъикIаб букIана. Дун гьел рихьизе тIоцебе рачIараб къоялъги щун вукIана, ракIалда буго цоги нухалъги вачIине. Гьарула БетIергьанасда тIолабго халкъалъе гьазул баракат гIамм гьабеян абун.
Энгереев МухIаммад, Гьигьалъ росу
Асарал рихьизелъун ниж росдал имамгун цадахъ къоло щугогIанасеб машина жамагIаталъулгун рачIана. Кутакалда вохана асарал гьанире рачIиналдасаги, щайин абуни кидаго гуро гьел рихьизе рес щолеб, хасго нижерго район ЦIумаде рачIун.
Гьединлъидал щвараб рес гIадада биччазе бегьилищха, хIаракат бахъана баркат тIалаб гьабизе. Кин бугониги хьулни букIунаан гьел гьаниреги рачIиналде. Асарал рихьиялдалъун гIадамазулги гьурмада кутакаб рохел загьирлъун бихьулеб буго.
МухIамадов ХIайбула, Агъвали росу
- Рес букIун гьединал зияратал гьоркьор риччаларо дица. Аварагасул асаразде зияраталъе тIоцебе 2012 соналъ махIачхъалаялда щун вукIана. Гьелда хадусан Инхелов ва жакъа гьале Агъвалибеги бачIана баракат. Авараггун асхIабзаби ва гьезул букIараб магIишат ракIалде щвана.
Кутакаб асар кьуна халкъалъулго хирияс жиндасан гьекъолеб букIараб чаша бихьидалги. Пикру гьабуна хириясул кIутIби жинда хъвараб чаша гьеб букIин. ЦIакъ пашманлъана, къварилъахъдана авараг вихьизе хьулгун. Аварагасул баркат шафагIат щваги нилъее. Къосараб къавмалдасаги Аллагьас нилъ цIунаги.
