Квен кин дагь гьабилеб?
Щибаб къойил кваналеб ригь чIезабила. Масала, къойида жаниб кIиго нухалъ кваназе ратани, гьелъиеги заман чIезабила ва цогидаб заманалда щибго кваналаро. Бищунго лъикIаб буго цIакъго ракъидал кваназе. Кванирукъ унтараз, зама-заманалда кваназе кколез гьеб жидедаго рекъезабила.
Кваназе лъикIаб гьечIеб квен-тIех рокъобе босуге. Масала, печенаби, конфетал, тортал, мороженое ва цогидабги гьезда релълъараб.
Гьуинлъаби хисила пайда бугеб кванидалъун. ЦIакъго яхI гьабизе кIоларого бугони, заралиял жал кваначIого, гIеч, ламадур кванала, рахьдал стакан гьекъела.
Тукадаса босараб гуреб, гIадатияб квен кваназе хIаракат бахъила. Масала, гьан, ччугIа, ражигун пер, овощал, рахьдал нигIматал.
Кваналеб кванил къадар дагь гьабила. ГIемераб жо цебе лъедал, чехь гIорцIун бугониги бер гIорцIулареб гIадат бугелъул.
Кваналеб мехалда телевизоралъухъ балагьизе, компьютералда нахъа гIодор чIезе, телефоналъуве ваккизе лъикIаб гьечIо. Пикраби цогидаб жоялда руссун ругони, лъазего лъачIого, гIемераб жо кванан батула.
Заманалда кьижа ва спорталда тIадчIей гьабе. Эркенаб заман гIемерлъарабгIан стресс цIикIкIуна. Стресс цIикIкIиндал кванде цIайиги цIикIкIуна.
Абула, нилъ жаниса кваналеб цIарагIалъул кьералда барабги букIунин инсанасул кванде гъира букIингийилан. Масала, багIараб, тIогьилаб кьералъул цIарагIалда жаниса кваналелъул, кванде цIайи цIикIкIинабула. ХъахIилаб, гIурччинаб цIарагIалъусан кваналелъул, кванде цIайи дагь гьабула.
