Гьикъизе нечараб бицине намусаб
КIухIаллъун йиго
Гьале лъабго моцIгIанасеб заман буго щибго гьабизе бокьуларого. Цее хIалтIулаан, цIалдолаан, гьудулзабигун дандчIвалаан, гIумруялдаса рохел букIунаан. Амма гьанже бокьулеб буго егизе, телевизоралъухъ балагьизе, дунго дидаго йикIине. Росасдаги хехго ццим бахъуна, гьоркьоблъиялдаса рикIкIалъула. Щиб дие лъугьунеб бугеб? КIвахIаллъийищ, ургъел гьечIолъийищ, яги цогидаб гIилладай бугеб? Киндай гьаб хIалалдаса дун йорчIилеб?
ГI., Хасавюрт
ГIалимчиясул жаваб
Цо-цо мехалда инсан лъугьуна щибго гьабизе бокьуларого, рухI бахъарал гIадин, живго вукIине бокьун. Гьел захIмалъабиги ккола ракьалда бугеб гIумруялъул цо бутIа. ТIадегIанав Аллагьас Къуръаналда абун буго (магIна): «Нижеца инсан вижана захIмалъабигун», - ян («ал-Балад» сурат, 4 аят).
Гьединлъидал, захIматаб хIал тIаде бачIиндал хIаракат бахъизе ккола жалго хутIичIого рукIине ва гьеб хIалалдаса ворчIизавулев чиясдаса кумек тIалаб гьабизе.
ТIоцебесеб иргаялда, Аллагьасда гьарила кумек. ДугIа гIемер гьабила, бигьалъи гьабеян гьарун.
Нилъеца кIвар кьезе ккола Аллагьасулгун гьабулеб гьоркьоблъиялде. Аллагьас дида тIадаблъун гьабураб жо дица тIубазабулеб бугищин абураб суал кье дуего. Щуябго как заманалда балеб бугищ, паризаял кIалал кколищ, цогидал парзал кIвар кьечIого толел ругищали балагьила. КIарчанлъи ккарал бакIал ритIизаризе хIаракат бахъила. ХIакъаб жо, как баялъ, Аллагь рехсеялъ ва цогидал диниял гIибадатаз кумек гьабула стресс ва рахIатхвей дагьлъизабизе, пикру щулалъизабизе. Гьединлъидал, гIибадат гьаби букIине бегьула захIматаб хIалалдаса эркенлъиялъе кIвар бугеб бутIалъун.
ХIаракат бахъила дагь-дагьккун пайдаял ишазде руссине: хъизамалъе кумек, гIагарлъиялъулгун гьоркьоблъи гьабиялде, хъизан-агьлугун тира-сверизе рахъиналде, цебе пайдаги рохелги кьолел рукIарал ишал гьариялде. Цойидасанго гIемераб жо тIалаб гьабуге. ГьитIинал галабаздасан байбихье.
Гьеб киналдаго цадахъ тохтурасул яги психологасул кумек тIалаб гьабизеги лъикIаб букIина.
Аллагьас кумек гьабеги.
Психологасул жаваб
Гьеб хIал гIадатияб кIвахIаллъиялда релълъун гьечIо. Лъабго моцIгIанасеб заманалъ кинабгIаги рохел кколеб гьечIони, гьоркьоса къотIичIого егун йикIинеги бокьулеб бугони, гIемер ццимги бахъунеб бугони, гьеб буго ургъел гьабизе ккараб жо.
Гьелъие гIиллаби батIи-батIиял рукIине бегьула. Гьезда гьоркьоб букIине бегьула цIакъго свакай, эмоционалияб унти, халат бахъараб стресс яги депрессия.
Цойидасанго цебе букIараб гIумруялде тIадюссине лъугьунге. ХIаракат бахъе щибаб къоялъ къватIие яхъине, макьил низам цIунизе, букIине кколеб къагIидаялъ кваназе, гьитIинаб бугониги, сахлъиялъе пайдаяб хIалтIи гьабизе. Дагь-дагьккун дуего рокьулел рукIарал хIалтIабазде тIадрусса, кигIанго бокьичIониги.
Гьединго, росасда яги цогидав хирияв чиясда кIалъан, захIматаб заман тIаде бачIиналда бан, дуего бугеб къварилъи загьир гьабила.
Амма гьеб хIал лъабго моцIгIанасеб заманалъ букIиналъ, бищун лъикIаб буго психологасухъе яги тохтурасухъе ине. Цо-цо мехалда гьединал гIаламатал тIаса ине гьаризе ккани, къваригIуна гьединазулги кумек.
ХIадур гьабуна Жабир Мажидовас
