Эбелалде
Эбел, дур хирияб цIар бахъарабго,
Биун, биун уна дир каранда ракI,
Рокьулел кверазда кверал хъварабго,
Хинлъула тIолго черх, чучула ургъел.
Лъимал гIодулелъул сардал рорчIарай,
Лъимал кьижун хадуй хIалтIун свакарай,
Хасаб дурго рокьул кваркьабазда гъоркь
Квешлъабаздаса ниж, цIунун, хьихьарай.
ХIулидалъ лъун лъимал хьихьулей эбел,
Хьул лъунщинаб босун ячIуней эбел,
Берал къанщаниги кьижичIей эбел,
ТIанчIи кьижарабго яхъуней эбел.
Лъимал ххараралъуй хадуйго хьвадун,
Хьитал картIаххарай, камилай эбел.
Кинабго дуниял жиндий хIалалай,
ХIал жиндир чIахъаяй, чIурканай эбел.
Эбелалъул къимат къойилго гьабе,
КъваригIун батани алжан босизе.
Бокьараб квине кьун, кодой ккун хьихье,
Кири бикьулезул кьерда рахъине.
Эбелалъул хIатIикь алжан бугилан
ХIадисги бугелъул аварагасул,
Аллагьас нилъее бичIчIиги лъайги
ЛъикIаб рахъалдасан бикьун батаги.
Эбелалде данде гьумерги букIкIун,
Гьаракь борхаравгун гьудуллъи ккоге.
Мунго гьавуралда хIеренго кIалъан,
КIудияб даража дуего босе.
