ХIеж – тIалъиялъе хIикмат
ХIеж ккола исламалъул анлъабилеб аркан. Сахлъиги боцIи-малги бугесда тIалъула гIумруялда жаниб цо нухалъ паризаяб хIеж борхизе. Щивав бусурбанчиясул гьениве ине ниятги хивалги букIуна. Гьелда жаниб гIемераб пайдаги буго. Гьеб гIибадат ккола ТIадегIанав Аллагьас ﷻ кIудияб кири хъвалеблъун, мунагьал чурулеблъун. ХIарамалъул мажгиталда цо бараб какалъулъ нусазарго кири щолинги буго.
ХIеж тIалъиялъе чанго хIикмат буго
Абул Гьуда Шайхица абуна: «ХIеж гьабулелъул гIадамал цоцазда лъала. Умматалъул щиб хIал бугебалиги лъала. Цоцазухъ балагьиялдаса бусурбабазе баракатги щола», - ян.
Адам аварагас КагIба байдал, ТIадегIанав Аллагьасда абула: «Щибаб гIамалалъухъ Дуца кири хъвала, дир гIамалалъухъ щиб кири бугеб?» - ян. БетIергьанас абула: «Дуца тIаваф гьабидал, Дица дур мунагьал чурила», - ян. Адам аварагас абула жеги цIикIкIинабеян. Аллагьас ﷻ абула: «Дица КагIба дуе ва дур лъималазе къиблалъун гьабила», - ян. Адам аварагас абула жеги цIикIкIинабеян. ТIадегIанав Аллагьас ﷻ абула: «ТIаваф гьабулезул Дица мунагь чурила», - ян. Адам аварагас абула гьеб гIелин абун.
Халиф ГIумар ибн ХатIабица абуна: «КагIба-рукъалде щвезе гурони тIокIаб къасдги гьечIого хIежалда тIаваф гьабуни, мунагьаздаса вацIцIалъула эбелалъ гьабураб лъимер гIадин», - ян. КагIба ккола ТIадегIанав Аллагьас ﷻ киналниги рукъзабаздаса жиб тIаса бищараб, кIодо гьабураб рукъ.
Киназулго суал букIуна хIеж къабул гьабураблъи кин лъалебин абураб. Гьелъие жаваб гьабуна кIудияв табигIун ХIасанул Басрияс.
Гьесдаги гьикъула хIеж къабул гьабураблъи кин лъалебилан абун. Гьес жаваб гьабула ахираталде хьулги лъун хIежалдаса вуссиналдасан лъалин абун.
