Нажаслъи тIад букIаго…
Нажаслъи тIад букIаго…
Черхалда, яги ратIлида, яги какикь тIамураб жоялда нажаслъиги тIад букIун, как базе бегьуларо. Нажаслъи тIад букIин лъачIого как бан батани, гьебги тIаса инабун, цIидасан бала как. Гьеб какил гIуж борчIун батани бецIунги бала.
Какилъ гIафву гьабулеб, ай тIаса лъугьун толеб нажаслъи
КъватIал чорокго ругони, ратIлил цIунизе захIмалъулел бакIазде гьеб бахунеб бугони, гьелдасаги гIафву гьабула. Нажасаб къватIалдаса рачIунел цIадал тIирабаздасаги, ругъназул, рижарал жалазул биялдасаги, укол гьабун баккараб биялдасаги гIафву гьабула, нацI-чIетIалъул биялдасаги, рахьдалъе дагьа-макъаб рак бортани, гьелдасаги гIафву гьабула. ЛагIараб лъимералъул кIал эбелалъул кереналда хъвани, гьелдасаги гIафву гьабула, хъураб хIайваналъул чехь-бакь-бакIвалиялда чурун хадуб хутIараб гIиси-бикъинаб ракалдасаги гIафву гьабула. Ракуца бакараб цIаялдалъун бежараб чедги кваназе бегьула, хIаналъулъ бетизе хIалтIизарулел жалаздасаги гIафву гьабула, хIама-гIорцIеналда тIад рекIунаго ратIлида хурхарал расаздасаги гIафву гьабула. Къокъго абуни, жиндаса цIунизе захIмалъулебщинаб нажаслъиялдаса гIафву гьабула.
