Қуръакашӣ «Истиқлол»-ро бо дастаҳои ҳариф ошно мекунад

Қуръакашӣ «Истиқлол»-ро бо дастаҳои ҳариф ошно мекунад

Конфедератсияи футболи Осиё ҳайати сабадҳои қуръакашии марҳилаи гурӯҳии Лигаи қаҳрамонҳои Осиё-2023/24 дар минтақаҳои Ғарбу Шарқро эълон кард. Қуръакашии марҳилаи гурӯҳии мусобиқаи бузургтарини бошгоҳҳои Осиё 24-уми август дар Куала-Лумпур баргузор мешавад.

Аз рўи натиҷаи қуръакашӣ даҳ гурӯҳ иборат аз чордастаӣ ташкил карда мешаванд. Марҳилаи гурӯҳии Лигаи қаҳрамонҳои КФО аз шаш давр иборат буда, 18-уми сентябр оғоз шуда, 13-уми декабр ба анҷом мерасад. Ҳама дастаҳо дар майдони худ ва дар меҳмонӣ рақобат хоҳанд кард.

Қаҳрамони Тоҷикистон – «Истиқлол»-и Душанбе пеш аз қуръакашии мавсими нави Лигаи қаҳрамонҳои КФО дар қатори бошгоҳҳои «Ал-Файсалӣ» (Урдун), «Аҳал» (Туркманистон), «Мумбай Сити» (Ҳиндустон) ва чемпиони Ироқ, ки баъдтар муайян мегардад, шомили сабади сеюм гардид. Ин маънои онро дорад, ки қаҳрамони Тоҷикистон дар марҳилаи гурӯҳии мусобиқот бо ин дастаҳо бозӣ намекунад.

Аз рўи ҷамъбасти марҳилаи гурӯҳӣ ғолибони панҷ гурӯҳ аз ҳар минтақа, инчунин се дастае, ки дар чаҳоргонаи худ бо натиҷаи беҳтарин ҷойи дуюмро ишғол мекунанд, ба даври ҳаштякниҳоӣ роҳ меёбанд.

Сабадҳои қуръакашии марҳилаи гурӯҳии Лигаи қаҳрамонҳои Осиё-2023/24:

Минтақаи Ғарб:

Сабади 1: «Ал-Иттиҳод» (Арабистони Саудӣ), «Персеполис» (Эрон), «Ал-Садд» (Қатар), «Пахтакор» (Ўзбекистон), «Ал-Ҳилол» (Арабистони Саудӣ).

Сабади 2: «Сипоҳон» (Эрон), «Ал-Дуҳайл» (Қатар), «Насаф» (Ўзбекистон), «Ал-Файҳа» (Арабистони Саудӣ), «Нассоҷи Мозандарон» (Эрон).

Сабади 3: «Ал-Файсалӣ (Урдун), «Истиқлол» (Тоҷикистон), қаҳрамони Ироқ, «Аҳал» (Туркманистон), «Мумбай Сити» (Ҳиндустон). Сабади 4: «Ал-Айн» (АМА), ғолиби ҷуфти «Ал-Наср» (Арабистони Саудӣ) – «Шабоб Ал-Аҳлӣ» (АМА), «Ал-Ваҳдат» (Урдун), ғолиби ҷуфти «Трактор» (Эрон) – «Шарҷа» (АМА)/«Башундара Кингс» (Бангладеш), ғолиби ҷуфти «Ал-Арабӣ» (Қатар) – АГМК (Ўзбекистон)/«Ал-Сиб» (Уммон), ғолиби ҷуфти «Ал-Вақра» (Қатар) – «Навбаҳор» (Ўзбекистон).