Табасаранлуйир гьяждиъ

Ассаламу аьлайкум, аьзиз ватанагьлийир!

Гьяж Ислам диндин хьубпи мурхьул ву. Гьяж тамам апlбан гьякьнаан улихь нумрариъ яркьуди ктибтнийхьа.

Му макьалайиъ гьаму йисан ихь ватанагьлийир гьяждиз душну, чпиин али фарз тамам апlбакан мялумат тувдихьа.

Му йисан гизафдариз гьяж кьисмат гъабхьну: саспидариз - чпин дакьатарихъ, тмундаризсана - сенатор С. Керимовди туву путёвкйирихъди.

Гъийин макьалайиъ жвуван пулихъ гъушдарикан ктибтурхьа.

Дурарин кьадарра цlиб дайи. МашаАллагь, ихь ватанагьлийирин гьяждин месэлайин гьякьнаан вуйи гъайгъушнарин натижйир йислан-йисаз ужудар шула. Магьа гьаму йисанра Табасаран ва Хив районариан, Дербент, Огни, Каспийск ва Мягьячгъала шагьрариан вуйи ихь ватанагьлийир гьяждиз душнайи.

Аьхиримжи йисари гьяждиз гъягъру табасаранлуйирин чпин кIул`инди вуйи дестйир ади шула. Думу дестйирин кlулиъ Табасаран райондин имам Ансар Рамазанов ади гъягъюри магьа сакьюдар йисар ву. Му ихь халкьдиз аьхю гъулайвал ву.

Гьаму йисанра 42 касдикан ибарат дубхьнайи десте айи. Душваз Табасаран ва Хив районариан, Дербент райондиан ва Каспийск шагьриан инсанар дахил духьнайи.

25-пи майди Мягьячгъалайиан Медина шагьриз дурар рякъюъ учlвнийи. Магьа юкьуб сяаьтналан дурар Пайгъамбарин ﷺ шагьриз хъуркьну. Дишлади Пайгъамбарихьна ﷺ зиярат дапlну, жвуван терефнаан ва гьацира жвувахьди саламар хътау имбу ксарихьан Пайгъамбариз ﷺ саламар гъурукьну. Мединайи айи вахтна, думу шагьриъ айи асас зияратаризра душну, хъасин Мекка шагьриз гъушу. Мекка шагьриъ гирами Кябайилан илдицну, жвувхъан, жвуван багахьлуйир-мирасарихъан дюъйир апlури гъахьнийи.

Мекка шагьриъра жюрбежюр зияратар апlури, чиб-чпихъан дюъйир апlури, гьациб къайдайиинди гъахьну.

Дупну ккундуки, вари уч духьнайидариз чиб-чпи саб хизанси, гьадмукьан чиб-чпихьна гьюрмат ади, чиб-чпиз кюмек апlури гъахьну. Гъит Аллагьу Тааьлара му ксарикан рази ишри.

Аьрафа дагъдиин дугъужвуваликан лапра яркьуди ктибтуз шулу. Думу чюлиз гъафидарин Аллагьу Тааьлайи варидарин гунгьарин аьфв апlуру - гьаци дупна гьядисариъ. Думу гьяждин варитlан асас пай ву. Эгер фужкlа Аьрафа дагъдиз дарфиш, дугъан гьяж кам шулдар.

Думу йигъан варидари дюъйир апlури, Аллагьу Тааьлайикан гунгьарин аьфв апlуб ккун апlури, артухъди гирами Калам урхури, зикрар, салаватар урхури шулу.

Жвуван багъри юрдариан душну кьяляхъ гъяйизкьан гьамциб къайдайиинди му ксар гъахьну.

Магьа 15-пи июнди вари сагъ-саламатди, гьяждин вари фарзар заан дережайиинди тамам дапlну, жвуван багъри юрдариз кьяляхъ гъафну.

Каспийск шагьрин аэропортдиъ гьяжйир гюрюшмиш апlуз чпин багахьлуйир дуфнайи. Дурарин машнан разивал гъябкъган, фициб хушниинди дурари гьяжйир гюрюшмиш гъапlнуш, жвуван улариинди дябкъну ккуни ляхин ву. Гьяждиз гъягъюб ва дурар къаршуламиш апIуб гьамциб шадвалин ва Аллагьу Тааьла рази шлу ляхнарикан ву.

Гьамдихъди сабси пуз ккундузузки, гьюрматлу ватанагьлийир, 2026-пи йисаз гьеле гьяждиъ душну адрудари, кьан дарапlди ният апlинай. Ният гъабхьиш, Аллагьу Тааьлайи рякъяр ачмиш апlур, ин ша Аллагь.

Му жилиин ухьу фукьан артухъ Аллагьу Тааьлайиз ибадат апlури гъахьиш, гьадмукьан ухьуз аьхиратдиъ рягьятди шул. Аллагьу Тааьлайин разивал гъабхьиган, Дугъан рягьматра ухьуз артухъди шул, ин ша Аллагь.

Гьюрматлу гъардшар ва чйир! Улихь вахтари ихь аьхю абйирин гьяждиз гъягъюз лап юкlв хъади, амма шули гъабхьундар. Думуган гъийин йигъанси рякъ рягьятди дайи, вазариинди ликри гъягъюйи.

Аллагьу Тааьлайи ухьуз тувнайи ниъматариз гьямд апlурхьа ва, гъачай, жвув’ин али фарзра Аллагьу Тааьлайин улихь тамам апlурхьа.

Гъийин йигъан Аллагьу Тааьлайи тувнайи рягьятвалар ишлетмиш дарапlди, гьяждиз мумкинвалра ади, амма тамам дарапlди гъитиш, ихь аьхиратдин йигъар читнидар шул.

Гъит Аллагьу Тааьлайи варидарин гьяж кьабул апlри, гъит гьеле гьяждиз дурушу ксариз думу гирами жилариина Аллагьу Тааьлайи рякъяр ачмиш апlри. Гьарсар мусурман касдиз чан вари ужувлан ниятар кlулиз адагъуз Аллагьди тавфикь туври! Амин!

Табасаранлуйир гьяждиъ