Жигьиларин гьялак`вал
Жигьиларин гьялак`вал
Жигьиларин гьялак`вал
Аллагьу Тааьлайи гирами Каламдиъ дупна (мяна): «Аллагьу Тааьлайин рякъюхъна гьикматвалиинди ва ужуб насигьятниинди теклиф апIинай…». Гьаму гирами аятдиъ Аллагьу Тааьлайи ухьуз, Чан рякъюз инсанариз фици теклиф дапIну ккундуш, ачухъди дупна.
Саб му ляхин ваъ, хъа фунуб вушра ляхин гьамци утканвалииинди, ужуб гафниинди кIури гъахьиш, дидкан аьхю мянфяаьт а ва Аллагьу Тааьлайинра разивал шул.
Му бицIи макьалайиъ жигьиларин гьялак`валикан ктибтуз ккундузуз. Гьяйифки, гъи жигьилариз чпи кIурубтIан рябкъюрадар, чпи кIуруб гьякь, имбудари кIуруб нягьякь - магьа саспидарин гьамциб фикир ву. Мурариз гирами Каламра, Пайгъамбарин ﷺ гьядисарра анжагъ чпизтIан аьгъдар кIури фикир вуш кIури хиял шулу.
Гъийин дюшюшариз фикир тувай, саспи вахтари жигьилари апIру гафариин мюгьтал шулу. Магьа дурарикан бязидар: йиз аба-баб гьеле Ислам диндиз дуфнадар, йиз гъунши мусурман дар ва гь.ж.
«Йиз аба-баб гьеле Ислам диндиз дуфнадар» - му гафар себеб духьну инсан лап читин гьялнаъ хьуз мумкин ву. Яв аба-баб кяфирар вуш, хъа дурариланмина гъахьи веледарин гьял фициб ву? Яв гьял фициб ву? Хъа дурар мусурмнар даруб фици ахтармиш гъапIунва? Тмуну касдиз мусурман дар кIуру гьюкум адабгъайиз шариаьтдиъ улупнайи къайдйир ахтармиш гъапIуна?
Гьаму суалариз уву якьинди жаваб тувиш, ари гьадмуган уву гьякь даруб мялум шулу. Гьич сар мусурман касдира мусурман дарза асуллагь кIурдар. Ав, дурарикан ктучIвру саспи ляхнар лап чIурударра хьуз мумкин ву. Хъа инсанади шагьадат келима урхури, Аллагьу Тааьла ва Мугьяммад пайгъамбар тасдикь апIуруш, думу мусурман кас ву. Эгер му ляхнар тасдикь апIурдарш, думу мусурманвалиан удучIвуру.
Сабур апIинай, жигьалар! Гьялак махьанай. Гьарсаб апIру ляхин ухьуз Аллагьу Тааьлайи дупнайиганси гьикматвалиинди ва ужуб гафниинди дубхьну ккунду. Ухьу гьялакди апIру гафариланмина гъуландарин, мирас-варисдин арайиъ аьлакьйир чIур хьуз мумкин ву. Мусурмнар чиб-чпихьан жара духьну ккундар, дурар жара апIру ляхнарихьан ярхлара духьну ккунду.
Ихь табасаранлуйирин арайиъ чIуру аьдатар думукьан адар, айидарра яваш-явашди, уткан вяз-насигьят апIури, адагъуз шлудар ву. Эгер дурарикан лап аьхю зарар аш, сабпи нубатнаан, имамари, аьлимари думу ляхнар къайдайиз хиди, хъа жямяаьтдинна, инсанаринна гъаври адру жигьилари ваъ.
Гьарсар жигьилихъан юкIв убгури му макьала бикIураза ва дурарикан саризкьан мянфяаьт шул кIури умуд кивраза.
Илим урхай, илим аьгъю апIинай, му ляхнихъ хъубкьруб фукIара адар. Илим айи касдихъди гаф-чIал апIузра рягьят ву, инсанарин арайиъ гьюрматра, мясляаьтра шулу.
Илим урхувалихъди гьамукьадар ужувлар арайиз гъюраш, гьаз ухьу, му ляхниз фикир тутрувди, имбу ляхнар заанди дидиснайкIан?
Аллагьу Тааьла ухьуз варидариз кюмек ишри, гъит ухьуз гьякь`вал рябкъюз тавфикьвал туври, чIуру рякъхьан, шейтIнин рякъхьан ярхла апIри! Амин!
Ансар Рамазанов
