Пайгъамбарин ﷺ кагъаз
Пайгъамбарин ﷺ кагъаз
Думу вахтна
Дамаск шагьрин
Сардар вуйи
Аль Харис ибн
Абу-Шимр. Ва
Ихь Пайгъамбри
(Салават ва
Салам дугъаз)
Шуджа ибн Вахб
Гьау, хьади
Гьамциб кагъаз:
«Сар Аллагьдин
Ччвурнахъанди,
Дугъу гьаур
Ву Мугьяммад.
Аль Харис ибн
Абу-Шимрйиз.
Ислягьвал шул
Дюз рякъюъди
Гъягърудариз,
Сар Аллагьдихъ
Хъугърудариз,
Ислам диндиз
Гьюрмат апlру
Инсанариз,
Мусурмнариз.
Ибадатвал
Дапlну ккунду
Сар Аллагьдиз,
Жарариз ваъ.
Юлдшар, дустар
Дугъаз адар.
Эгер уву
Кьабул гъапlиш
Пак ислам дин,
Гъузурва яв
Кевшанар`ин
Ву аьхюрди».
Кагъаз дубхну,
Гьарйир апlуз
Хъюгъю Харис:
«Фуж ву мицир,
Узу йиздар
Кевшанарлан
Ултlуккуз шлур?
Зу дугъахъди
Дяви апlуз
Гъягъидиза».
Дишла кагъаз
Хьади гьау
Византийин
Паччагьдихьна,
Ккун апlури
Дяви апlуз
Ихтияр чаз.
Ираклийи
Чан ихтияр
Тувундайи.
Савкьатарра
Хьади, кьяляхъ
Гъафи Шуджа.
***
Бусрияйин
Гьюкумдариз
Ихь Пайгъамбри
(Салават ва
Салам дугъаз)
Хътапlу кагъаз.
Кагъаз хьади
Гъушур вуйи
Аль Харис ибн
Умайр кlурур.
Гьерхуб-хъерхуб
Дапlну, мугъан
Кlул алдабтlуз
Гъапlу амур
Шурахлибди.
Ихь Пайгъамбрин
(Салават ва
Салам дугъаз)
Вакиларкан
Гьаму ву сар
Алдабтlур кlул.
Думу ляхин
Себеб гъабхьи
Ккебгъуз дяви
Пис душмнихъди.
***
Оман кlуру
Вилаятдин
Паччагьдихьна
Ихь Пайгъамбри
(Салават ва
Салам дугъаз)
Кагъаз хьади
Гьаур вуйи
Аль Амр ибн Ас.
Думу кагъзик
Дибикlнайи:
«Рягьимлу вуй
Сар Аллагьдин
Ву ччвурнахъан,
Дугъу гьаур
Ву Мугьяммад –
Аллагьдин лукl.
Джайфар аль ибн
Джаландийиз
Ва Абд аль ибн
Джаландийиз.
Ислягьвал шул
Дюз рякъюъди
Гъягърудариз.
Сар Аллагьди
Гьаъну айи
Пайгъамбарза.
Тlалаб вуйиз
Кьабул апlуб
Ислам дин. Дарш
Йиз гьяйвнари
Ичв вилаят
Тlибкьиди гьа!
Аьгъю йибхьай,
Пайгъамбарвал
Ву заанди
Паччагьвалтlан.
Гъалиб шулза».
