Пайгъамбарин кагъаз
Пайгъамбарин кагъаз
Кагъаз дурхну,
Абдди гьерху:
«Фу ккунду, йип,
Ичв пайгъамбриз?»
Жаваб туву
Амр ибн Асди:
«Сифте кьабул
Апlуб ич дин,
Тасдикь апlуб
Аллагь сар ву,
Мугьяммадра
Гьауб Дугъу.
Зат гунагьар
Дарапlуб ва
Угъри ляхнар
Ярхла апlуб,
Дюз-дугъривал
Апlуб мюгькам,
Ичкки-чяхир
Дурубхъувал,
Жарариз ваъ,
Сар Аллагьдиз
Апlуб икрам».
«Вари кlуруб
Ву ужувлаз,
Вуза рази
Кьабул апlуз
Му ислам дин.
Амма йиз чве
Вуйиз ккунир
Аьхювалар», -
Гъапи Абдди.
Жаваб туву
Амр ибн Асди:
«Хъа яв чвуччву
Кьабул гъапlиш
Му ислам дин,
Гъузди думу
Паччагьди чан
Халкьдин багъри…»
Абд гъушнийи
Чвуччвухьна чан.
Дугъу гьерху:
«Фициб жаваб
Тувди ухьу?»
Абдди гъаврикк
Ккау чан чве
Ислам диндин
Рякъярикан.
Цlиб вахтналан
Кьюред чвйири
Кьабул гъапlу
Ихь ислам дин.
***
Ямамайин
Гьюкумдрихьна
Ихь Пайгъамбри
Кагъаз хьади
Гьаур вуйи
Сулайт ибн Амр.
Думу кагъзик
Дибикlнайи:
«Рягьимлу вуй
Сар Аллагьдин
Ву ччвурнахъан,
Мугьяммад ву
Дугъан гьякь лукl,
Дугъу гьаур.
Хавза Аьлдиз.
Ислягьвал ву
Дюз рякъюъди
Гъягърудариз.
Аьгъю апlин,
Йиз дин-тlяаьт
Варишвариъ
Рабгъурайиб.
Уву кьабул
Апlин ислам.
Гьарган диди
Уьрхидива.
Гъузди увуз
Увухъ хъайи
Яв кевшанар».
Сулайт ибн Амр
Шадди кьабул
Гъапlнийи ва
Багьа вуйи
Савкьатарра
Туву дугъаз.
Гъибикlнийи
Жаваб-кагъаз:
«Фукьан гюрчег,
Дюз-дугъри ву
Му яв теклиф!
Шаир вуза
Ва йиз халкьдин
Вуза аьхюр.
Яв аьхювал
Узухъди пай
Гъапlиш уву,
Гъюрзавухъди».
Ихь Пайгъамбриз
Гъеебхьиган
Дидкан хабар,
Гьамци гъапи:
«Эгер узхьан
Саб чlиб йишван
Ча гъапишра,
Тувидарза.
Думу учвра,
Чан айибра,
Сабра дарди,
Гьаци дургди».
Гъубшундайи
Сацlиб вахтра,
Гьаци гъабхьи.
Ямамайин
Паччагь вуйи
Хавза Аьли
Кечмиш гъахьи.
