Мекка шагьриз...
Мекка шагьриз...
Кьасумов Амир Мирзаевич,
Жулжагъ гъул.
Дагъустан Республикайин культурайин лайикьлу работник (2004 й).
РФ-йин журналистарин Союздин член (2005 й).
РФ-йин уьмуми образованияйин лайикьлу работник (2006 й).
РФ-йин президентин грантдин сагьиб (2009 й). РФ-йин мялимарин устадвалин бина конкурсдин дипломант (1 степен, 2017 йис.)
Нуайм вуйи
Аьмалдар кас,
Тухумдихьан
Чан жиниди
Кьабул дапlну
Ихь ислам дин,
Гъафи думу
Пайгъамбрихьна
(Салават ва
Салам дугъаз).
Гьау думу
Наразивал
Ипуз душмнин
Тухмарихьна.
Нуаймди кlур:
-Кьурайшитар,
Йиз тухмарра
Учвухъди ву.
Вузуз хабар
Тухум Курайз
Дубхьна швумал.
Эгер учвкан
Ккун гъапlишра,
Аманатар
Мутуванай.
Кьурайшитар
Гъахьи гьялак,
Чпин чархачи
Гьамциб хабар
Кайи кагъаз
Хьади гьау
Жугьдарихьна:
«Закур ву киш,
Гьюжум апlуз
Гьязур йихьай».
Хъа жугьдари
Туву жаваб,
Чпиз Нуаймди
Улупганси:
«Бала хуруб
Ухьуз гьарган
Даринхъа киш?
Тувай учуз
Аманатди
Ургцlур адми,
Дарш учвухъди
Шулдар учу».
Кьурайшитар
Гъавриъ ахъу:
Нуайм ву гьякь,
Тасдикь гъапlну
Чархачийи
Гъабхи хабри.
Къад йигъ гъушу,
Кьурайшитар
Духьну кlахъни.
Му арайиъ
Ихь Пайгъамбри
(Салават ва
Салам дугъаз)
Кюмек тувуб
Ккун гъапlнийи
Аллагьдикан.
Ва Жабраил
Малайикди
Хабар дебкку:
«Сар Аллагьдин
Амриинди
Гьапlна кулак,
Пислук яман».
Цlиб вахтналан
Хъиву кулак,
Бутпересар,
Кьурайшитар,
Жугьдар – вари
Гьергну гъушу,
Гъитну чадрйир,
Девйир, чарвйир.
Мусурмнари
Дурар хъаъру,
Арццну урнар,
Шагьриъ аъру,
Касибариз
Пай апlуру.
Ихь Пайгъамбри
(Салават ва
Салам дугъаз)
Шагьристнариз
Гьамци гъапну:
«Душмниз сарун
Кlваин хьибдар
Му ихь шагьур».
Сяргьятар`ин
Гъаравлар ал
Мугъаятди.
Гьарсар гъушу
Чан хулазди
Архаинди.
***
Хулаз гъафи
Пайгъамбарра
(Салават ва
Салам дугъаз),
Яракь диву,
Духьну бизар.
Ихь Жабраил
Малайик гъюр
Ва гьамци кlур:
-Ухди яракь
Фаркьат мапlан,
Малайикар
Яракьламиш
Духьну ими.
Душмнин рюгьнак
Капlри а гучl,
Гъит, удубкьри
Гъумраъ мучlмучl».
Ихь Пайгъамбри
(Салават ва
Салам дугъаз)
Уч гъапlнийи
Хъана кьушмар.
Кидитlну а
Хъана Аьли,
Саб хлиъ пайдагъ,
Саб хлиъ гъилинж,
Гьяйвниинди
Гьучlвна улихь.
Ансарарна
Мухаджирар
Рякъюъ учlву.
Вахт гъабхьиган,
Дапlну гъудган,
Агуз хъюгъю
Хаин душмнар.
Амма дурар
Жин духьну а
Чпин хулариъ.
Ихь Пайгъамбри
(Салават ва
Салам дугъаз)
Вахт тувнийи
Фикир апlуз.
Ка`бди кlуру
Чан кьушмариз:
- Девлет гъубзуз,
Хпар, бицlидар
Йисир дархьуз
Аьмал ахьуз –
Кьабул дапlну
Ккунду Ислам.
А рякъ сабсан:
Учвуз вардиз
Гьюжмиз теклиф
Апlураза,
Яракьари
Кlуруб пиди.
Къад йигъ гъубшу,
Сачдин йифси,
Яваш-яваш
Йисирарди
Мютlюгъ шулу
Душмнин кьушмар.
Ихь Пайгъамбри
(Салават ва
Салам дугъаз)
Гъапи магьа:
-Бицlидарна
Хпар жаради
Дерккай. Зунжрар
Алахьну ккун
Жилариин.
Авситариз
Гъапи хъана
Ихь Пайгъамбри
(Салават ва
Салам дугъаз):
-Учвкан сариз
Пуз гъитраза
Ичв гележег.
Шулуш рази,
Йипай варди.
Са`ддиз тувну
А ихтияр.
Гъизгъин дявдиъ
Духьну зийнар,
А гъагъиди.
Вушра гъапи
Лап хъял кади:
-Хпар, бицlидар
Тувай масу,
Мутму, девлет
Пай апlинай.
Жилар кlуруш,
Дариз зигай.
Амрайин риш
Райгьанатра
Йисирвал`ан
Азад гъапlу,
Ихь Пайгъамбри
(Салават ва
Салам дугъаз)
Шивди гъахуз
Йикьрар гъапlу.
Са`ддин зиян
Ачмиш гъабхьи,
Цlиб вахтналан
Думу гъакlи…
