Жулжагъ гъулаъ аьхю серенжем

Майдин вазлиъ Табасаран райондин Жулжагъ гъулан клубдиъ аьхю мажлис кIули гъубшну. Му мажлисдиъ Дагъустандин Муфтиятдин ЮТО-йиъ айи вакил Гьюсейн Гьяжиев, Дербент шагьрин Мугьяммад Ярагъийин ччвурнахъ хъайи мистан имам Мугьяммад Майранов, Хазар гъулан имам Къурбан Рамазанов ва гьацира жара имамар иштирак гъахьну.

Мажлис кIулиъ гъабхурайир Табасаран райондин имам Ансар Рамазанов вуйи. Му гирами мажлисдиъ дуфнайи имамари-аьлимари гъийин йигъан айи учIру месэлйирикан ктибтну. Къурбан Рамазановди чан улхбаъ хизанар ккадахьурайиваликан, жигьиларин арайиъ наразивалар артухъ шулайиваликан яркьуди ктибтну.

Мугьяммад Майрановди уч духьнайидариз инсанди фу къайдайиинди уьмур хъапIну ккундуш, фицдар къанунарихъди душну ккундуш, ктибтну. Муфтиятдин Кьибла терефнаъ айи вакил Гьюсейн Гьяжиевди Аллагьу Тааьлайи Пайгъамбарихьанмина ﷺ -пророку фицдар амрар гьаънаш, жара пайгъамбарарин гьякьнаан гирами Каламдиъ фу дупнаш, ктибтну. Уьгълигъ гъулан имамдин заместитель Аьбдуррагьим ТIагьировди уч духьнайидариз насигьятнан гафар кIури, Пайгъамбарин гьяﷺ -пророкудисар гъахну.

Жулжагъ гъулан кьялан мектебдин директор Аьбдулмалик Аьзизовди вари жямяаьтдин терефнаан дуфнайи хялариз ва уч духьнайидариз чухсагъул къайд гъапIну ва, гележегдиъ мицдар серенжемар хъанара артухъ апIуваликан аьхю мянфяаьт а, гъапну. Мажлис ккебгъруганра ва ккудубкIруганра гаф гъапIур Жулжагъ гъулан имам Руслан Асланов вуйи. Думу касди кIваантIан варидариз чухсагъул гъапну.

«Мицдар мажлисар ачухъ апIуб ухьуз аьхю вуйи ужувларикан ву. Гьамдихъди сабси гьаму сяаьт Украинайи айи ихь баярра сагъ-саламатди кьяляхъ гъюб ккун апIури, Аллагьу Тааьлайихьна илтIикIидихьа», гъапну Руслан Аслановди. Жулжагъ гъулан имамдин заместитель Исмаил Ахмедовди уч духьнайидариз илимдикан, фициб жюрейиинди илим тIалаб апIуруш, ктибтну. Улхбарин арайиъ мавлидар-назмар урхури, Пайгъамбарин ﷺ -пророку уьмрикан суалар-жавабар туври, му серенжем кIулиз адабгъну.

Дупну ккундуки, му мажлисдиъ сабсана шаду ляхин гъабхьну. Мажлис хьайиз улихь йигъан Жулжагъ гъулаъ айи «Шадвал» кIуру садикдиъ бицIидарин арайиъ, диндин аьгъювалар шлиз артухъ аш, талит гъабхьну. Думу талитнаъ иштирак гъахьидарин арайиъ заан аьгъювалар гъадагъдариз гьаму мажлисдиъ грамотйир ва пешкешар тувбанди гъахьну.

БицIидари мицдар аьгъювалар садикди имидитIан улупбиин учу лап шад гъахьунча ва дурарин ччвурар учвузра мялум апIбанди гъахьунча:

1-пи йишв – Касимов Исмаил Микаилович,

2-пи йишв – Курбанов Салман Фарманович,

2-пи йишв – Раджабова Айша Расимовна,

3-пи йишв – Нуралиев Икрам Низамович,

3-пи йишв - Халифаева Алия Исматуллаевна, Магьа гьамцдар заан хъуркьувалар а ихь бицIидарин. Гъит Аллагьу Тааьайи му мажлис кьабул апIри, гъул-жямяаьтдиз, ихь вари ватандиз анжагъ ужувлар, хъуркьувалар ишри.

Школайиъ урхурайидарихъди гюрюш

Му йигъ Жулжагъ гъулаз берекетнануб гъабхьну. Мажлис ккебгъайиз улихь лисундин вахтна Табасаран райондин имам Ансар Рамазанов, Мугьяммад Майранов ва Дербент шагьриъ айи тренер Мурад Нурутдинов Жулжагъ гъулан школайиъ урхурайидарихъди гюрюшмиш гъахьну.

Мугьяммад гьяжийи дикъатниинди уч духьнайидариз ихь дин фувуш, ихь диндиъ фици абйир-бабарихьна, аьхюдарихьна, жвуваз илим туврайидарихьна гьюрмат апIбахьна теклиф апIураш, ктибтну. Ансар Рамазановди школайиъ урхурайидариз насигьятнан гафар кIури, мялимвалин ляхнин заанваликан ктибтну.

Лекция апIбан кьяляхъ бицIидари чпиз аьгъдрубдиан суалар туври, аьгъю апIури гъахьну. Му лекция тешкил гъапIдариз аьхю вуйи чухсагъул пуз ккундузуз, гъит Аллагьу Тааьла рази ишри ва гележегра акуб ибшри! Амин!