Заан Ягъдигъ цIийи мист ачмиш гъапIну
Заан Ягъдигъ цIийи мист ачмиш гъапIну
Табасаран райондиъ гьаму вахтна 10 мист тикмиш апIура. Шубуб мист, тамамди ккудукIну, магьа ачмишра дапIна. Гизаф гъулариъ мистар кюгьне вахтариндар ву, ва гьамус думу мистар лайикь вуйиси лихбан бадали, саспидари ремонт дапIну гъитра, хъа ремонт апIуз даршлудар тадаргъну, цIийи мистар тикмиш апIура.
Гьацдар мистарикан саб Заан Ягъдин гъулаъ айи мист гъабхьну. Улихьнаси му гъуландарин чпин саб гаф хьпиинди, гъулан кюгьне мист читин гьялнаъ айивализ лигну, цIийи мист тикмиш апIбанди гъахьнийи.
Саб кьадар вахтна гъулан жигьилари гьаму мист ккебгъну ккудубкIайизкьан вари ляхнар дирчну, гьаму ляхин кIулиз гъубхну.
Магьа 10-пи авгъустдиъ му гъулаъ мист ачмиш апIбахъди аьлакьалу вуди, аьхю серенжем кIули гъубшну. Му серенжем варидариз мажлисдиз гъюз мумкинвал шлуганси Ягъдигъ гъулан мектебдин гьяятдиъ кIули гъубшну.
Мажлисдиз жюрбежюр йишвариан инсанар дуфнайи. Хъа уч духьнайидарин улихь Муфтиятдин Кьибла терефнаъ айи вакил Гьюсейн Гьяжиев, Табасаран райондин имам Ансар Рамазанов, шариаьт илмарин доктор Рашид Аьлимурадов, Огни шагьрин кIулин мистан имам Мугьяммадрамазан Ражабов, Сулейман-СтIал райондин имам Шамиль Омаров, хъа жямяаьтдин терефнаан Заан Ягъдигъ гъулан школайин директор Осман Мягьямадов удучIвну гъулхну.
Мажлис ачмиш ва кIули гъубхур Ягъдигъ гъулан имам Мугьяммад Халиков вуйи.
Гирами Каламдиан сурйир урхури, дурарин арайиъ мавлидар-нашидарра урхури, му мажлис заан дережайиинди кIулиз адабгъну.
Аьлимари чпин улхбариъ мистар тикмиш апIбан заанваликан, илмин заанваликан, инсанарин чиб-чпихъди аьлакьйир ужудар духьну ккуниваликан ва инсанарин арайиъ тарабгънайи футнайикан яркьуди ктибтну.
Мистар апIуб саб ву, хъа мистар инсанарихъди арцIну, гьарсаб гъудгниъ жямяаьт ади хьуб - ари гьаму ву ихь мурад-метлеб.
Эгер жвумийин гъудгниз вари гъюри гъахьиш, гьарсар чаан удукьруси гъудгнариз гъюри гъахьиш, ари гьадмуган Аллагьу Тааьла му ляхникан рази хьиди.
Мистар апIбан мурад-метлебра гьадму ву.
Мистаз кюмек гъапIдар, Аллагьу Тааьла бадали му ляхниъ иштирак гъахьидар бахтлу инсанар ву.
Уч духьнайидарин улихь улхури Заан Ягъдигъ гъулан школайин директор Осман Мягьямадовди варидариз аьхю чухсагъул къайд гъапIну. «Учвуз рябкъюрайиганси, магьа ихь гъулаъ мист саб бицIи вахтна тикмиш дапIну ккудубкIунхьа. Му ляхниъ иштирак гъахьидариз чухсагъул! ДумутIанна гъайри, магьа ихь гъулаз асфальтра дапIна, сакьюдар йисар улихь ихь гъулан кьялаз асфальт шул кIури шлин фикир вуйи?! Гьаддиз му ужувлан ляхнариъ иштирак гъахьидариз варидариз кIваантIан чухсагъул кIураза. Гьацира аьхю чухсагъул кIураза райондин глава Мягьямед Сиражудиновичдизра, эгер дугъан кьувват дайиш, му рякъ ухьуз шулдайи», - гъапну Осман Мягьямадовди
Табасаран райондин имам Ансар Рамазановди му мист тикмиш апIбаъ иштирак гъахьи вари баяриз чугъсагъул гъапну ва дурарикан мист ккебгъу ккудубкIайизкьан душвахъ лихури гъахьи Фарман Къурбановдиз пешкешра тувну. Хъасин райондин имамди жямяаьтдиз цIийи имам тасдикь гъапIну, думу Пилигъ гъулан агьали Муслим Омаров ву. Гъит Аллагьу Тааьлайи дугъаз му жямяаьтдихъди заан дережайиинди ляхин гъабхуз кьувват туври.
Мажлис ккудубкIбан кьяляхъ вари сатIиди лавландин гъудган апIуз цIийи мистаз гъушну. Гъудгнин кьяляхъ мистаъ зикир дапIну, варидари сатIиди дюаь дапIну, алдабгъну.
Гъит Аллагьу Тааьлайи Ягъдигъарин жямяаьтдиз берекет туври, цIийи мист инсанарихъди абцIуз тавфикьвал туври, ужувлан ляхнарихьна багахь апIри, чIуру ляхнарихьан ярхла апIри.
