Пайгъамбарин жанди сирин гьаз туври гъабхьундар?
Суал: Пайгъамбар ﷺ ригъдикк ккайи вахтна дугъан жандин сирин шули гъабхьундар, кIуру гафар гьякьлудар вуйин?
Жаваб: Гьямд ибшри Аллагьу Тааьлайиз, салат ва салам Пайгъамбариина, Дугъан хизандиина ва вари асгьябариина.
Саб кIуруб, имам Муслимди ибн Аьббасдихьан вуйи гьядис хура, душваъ дупнаки, Пайгъамбари гъудгник кайи вахтна, ясана суждайиъ айи вахтна Аллагьу Тааьлайихьна гьаму дюаьйиинди илтIикIури гъахьну: «Я Аллагь, йиз юкIв аку апIин нурихъди, узу ебхьувалра нурихъди, рябкъювалра нурихъди, арччул терефра нурихъди, гагул терефра нурихъди, йиз заъланра, искканра ва узура нурихъди деркк».
Кьюб кIуруб, имам ат-Тирмизийира Закванийихьан гьядис хура: «Пайгъамбарин жандкихьан я ригъдикк, я вазлин аквнакк сирин ади гъахьундар».
Ибну Сабуъди гъапну: «Пайгъамбарин хусусиваларикан саб гьадму вуки, дугъан жанди туврайи сирин жилик кубкIри гъахьундар, дугъан сирин нурикан гъабхьну. Ва думу ригъдиккди, ясана вазлин аквнаккди гъягъруган, жанди сирин туври гъабхьундар».
Шубуб кIуруб, «Аль-вафа битаърифи гьюкьукьи аль-МустIафа» кIуру китабдиъ Ибн Аьббасдихьан дуфнаки «Пайгъамбарин жандин сирин ади гъабхьундар. Фу вахтна вушра, думу ригъдикк дугъужвган, дугъан нур ригъун аквтIан заанди шули гъабхьну…»
Натижа:
Пайгъамбарин хусусиятваларикан саб думу ригъдиккди гъягъруган жанди сирин тутруврувал гъабхьну. Думу дици хьпан себебра гьадму вуки, му кас Аллагьу Тааьлайи гьаци заанди дерккбан ва гьацира гьеле дугъан жандин сирниинкьан кяфирари лик илиливбан бадали. Гьадмукьан Аллагьу Тааьлайи думу заанди дерккна.
Гъит Аллагьу Тааьлайи ухьуз му Пайгъамбар ﷺ хъанара артухъ ккун апIуз тавфикь туври.
