Дагъустандин муфтийи тебрик апIура
Дагъустандин муфтийи тебрик апIура
Ассаламу аьлайкум ва рагьматуллагьи ва баракатугьу!
Гьюрматлу гъардшар ва чйир!
Ухьуз гирами Рамазандин ваз туву Аллагьу Тааьлайиз гьямд ибшри. Му гунгьарин аьфв апIру ва берекетнан ваз ву.
Гирами Рамазандин ваз мусурмнариз варитIан заанди дебккнайиб ву. Гьарсар мусурман касдин анжагъ саб «Рамазан» кIуру гаф ебхьниинди кIваъ шадвал абхъру. Му ваз ибадатнан, ккудудубкIру кьадар савабар тувру ваз ву, ва савабарин кьадарра анжагъ сар АллагьдизтIан ﷻ аьгъдар.
Гьямд ибшри Аллагьу Тааьлайиз, йислан-йисаз Рамазандин вазли йигъандин вахтна ушв бисрудар, хъа йишв ибадатнаъ адаъру инсанар артухъ шула. Дурариз Пайгъамбарин ﷺ гьядис кIваин дапIну ккунду: «Шли сад йигъан ушв гъибисиш Аллагьу Тааьлайи дугъанна жегьеннемдин цIин арайиъ заваринна жиларин арайиъ айибсиб манзилнан чухур гьязур апIур» (ТIабарани).
Аьгъю йибхьайки, ушв дибиснайи вахтна гьарсаб дакьикьайихъан Аллагьу Тааьлайи, му жилиин сарун гьич саб ляхнихъанра тутруврубсибкьан, аьхю саваб бикIуру. Му вазли ухькан гьарсар ужуб терефназди дигиш хьуз чалишмиш духьну ккунду.
Пайгъамбарин ﷺ гьядисдиъ дупна: «Фуну касди Аллагьу Тааьлайихъ кIваантIан хъугъну, Дугъак умуд кади Рамазандин вазли ушв гъибисиш, дугъан ккудушу вари гунгьарин аьфв апIур» (Аль-Бухари, Муслим).
Аллагьу Тааьлайи ихь варидарин ктучIву гунгьарин аьфв апIур кIури, умуд кивраза.
Му гирами вазлихъди вари тебрик апIураза ва му ваз заан дережайиинди кIулиз адабгъуб гьарурикан ккун апIураза.
