Халкьдиз мянфяаьт тувдихьа

Халкьдиз мянфяаьт тувдихьа

Дагъустандин вари шагьрар-районариъ Дяват отделар ачмиш дапlна. Улихь нумрайиъ ихь газатдиъ яркьуди Табасаран райондин Дяват отдели гъабхурайи ляхникан ктибтнийхьа.

Гьаму нумрайиъ Хив райондин Дяват отделикан, дидин вазифйирикан ва душваъ лихурайи гъуллугъчйирикан мялумат тувдихьа.

Дупну ккундуки, вари шагьрар-районариъ му отдели жигьиларихъди, школйириъ, спортзалариъ яркьуди ляхин гъабхура. Жигьилариз насигьят туври, дурарин арайиз гъюрайи суалариз жавабар туври, дурариз ужубна харжиб улупури, заан дережайиинди ляхин гъабхура.

Хив райондиъ Дяъват отделиъ лихурайир жара райондиан вуйи кас ву, гьаддиз дугъахъди сюгьбат гъабхуз ва дугъан му райондикан вуйи фикрарихъ хъпехъуз хъанара артухъ аьшкь шулу. Ич арайиъ гъабхьи сюгьбат магьа ичв фикриз туврача.

- Исмаил Мухтарович, сабпи нубатнаан ихь газат урхурайидар жикъиди увухъди таниш апlидихьа.

- Узу Зайнудинов Исмаил Мухтарович, Хасавюрт райондин Сивухъ гъулаъ бабкан гъахьунзу. Гьадушваъ 9-пи класс ккудубкlну, Чиркей гъулаъ айи диндин коллеждик урхуз кучlвунза, думуган дидин ччвур Саид афандийин ччвурнахъ хъайи ГПК кlуйи. Думу коллеждиъ, диндинси, светский образованияра тувра. 2014-пи йисан думу коллеж ккудубкlбан кьяляхъ Чиркейиъ айи Саид афандийин ччвурнахъ вуйи Дагъустандин диндин институтдик урхуз кучlвунза. 2018-пи йисан думу хъуркьувалариинди ккудубкlунза.

- Институт ккудубкlган, фу апlури гъахьунва?

- Институт ккудубкlган, дишлади Мягьячгъала шагьрин Дяват отделиъ лихури гъахьунза ва гьаддихъди сабси Мягьячгъалайиъ сабуну мистаъ имамди лихури гъахьунза.

- Хив райондиз фила алдахъунву?

- Узу Мягьячгъалайиъ лихурайи вахтна Хив райондиан Дяват отделиз регьбер ккунду кlури, тlалаб гъафну. Магьа гьамци му райондизди алдахъунзу. 2021-пи йисхъанмина Хив райондиъ Дяват отделин руководителди лихураза.

- Исмаил Мухтарович, уву жара райондиз гъафунва. Му халкьди уву фици кьабул гъапlну ва му халкьдихъди фицдар аьлакьйир уьрхюрава.

- Дюз кlуруш, табасаранари узу лап ужуди кьабул гъапlунзу. Сабпи йигъан дишлади табасаранлуйирин хинкlар ва цlикбар гьивунзуз, гьадму йигъан узуз деуз халра тувну. Сабпи вахтари сарди яшамиш шуйза, хъасин йиз хизанра хъади гъафунза. Мушваъ табасаранлуйирси, лезгйирра яшамиш шула, гизаф хялариз гьюрмат айи, аьхюр-бицlир аьгъю халкь ву. Пайгъамбарин гьядисдиъ дупна: «Фуж Аллагьу Тааьлайихъ ва Гъиямат йигъахъ хъугъраш, гъит дугъу хялижвуваз гьюрмат апlри». Йиз фикриан, гьаму гьядисдиз му халкь тялукь шула. Думутlанна гъайри, пуз ккундузузки, саб Хив район ваъ, вари му Кьибла терефнаъ яшамиш шулайидар лап ужуб хасиятнандар, сар-сариз гьюрмат айидар ву. Йизра мурарихьна гьациб ужуб аьлакьа вуйиз. Жвуву аьгъю гъапlу илмикан ктибтури, жвувхьан гьерхубдиз жаваб туври шулча.

- Хив райондиъ Дяват отделин вазйифйир фицдар ву?

- Сабпи нубатнаан, учу ихь имамарин кюмекчйир вуча. Ич мурад-метлеб ихь халкьдиз диндикан яркьуди ктибтуб, школйириъ айидариз лекцйир урхури, дурарин арайиз гъюрайи суалариз жавабар тувуб. Яни гьаму райондиъ диндихъди аьлакьалу вари ляхнариъ учу иштирак шулача. Думутlанна гъайри, райондиъ айи жюрбежюр организацйирихъди гюрюшмиш шули, дурариз диндикан хабар туври, мистариъ мажлисар апlури, душваъ бицlидариз дарсар туври шулча. Эгер «Инсан» фондди акция апlураш, гьадушваъра ихь Дяват отделин гъуллугъчйир кlулиъ шулу. Саб гафниинди, вари ужувлан ляхнариъ иштирак хьуз, халкьдиз мянфяаьт тувуз учу гьялак ва шад вуди шулча.

- Исмаил Мухтарович, уву жара райондиан дуфнайи кас вува. Сабпи ражари уву дуфнайиган ва гьамус Хив райондин диндин ляхнар фици рякъюравуз?

- Йигълан-йигъаз дигиш’валар а. Думу саб Хив райондиъ дар, хъа вари республикайиъ шулайиб ву. Гъи илим урхурайи баярра йигълан-йигъаз артухъ шула ва медресе, университет ккудубкlну гъафиган, думу баяри халкьдиз, жямяаьтдиз аьхю мянфяаьт тувра. Гьаддиз ухьу жигьилар тялимарди гьауз зегьмет дизигну ккунду. Магьа Кьибла Дагъустандиъ имамар вари йишвариз гьуркlрадар кlури, варидарикан ебхьури шулхьуз, хъа фу дапlну ккунду? Имамар адар кlури, дусну кlури шлуб адар. Фунуб гъулаъ имам адарш, ари гьадму жямяаьт думу ляхнин гъайгъушнаъ духьну ккунду. Жвуван гъулан жигьиларикан сар илим урхуз гьаъну, сакьюдар йисарилан аьгъювалар айи имам шлуганси. Имам адарди, гъудгниз экбер адарди гъибтуб жямяаьтдиз ужуб дару ва Аллагьу Тааьлайин улихьра жавабдар ляхин ву. Гьаддиз му месэлайиз гьарсаб жямяаьтди аьхю дикъатниинди фикир тувну ккунду.

Исмаил Мухтарович, увуз аьхю чухсагъул. Гъит Аллагьу Тааьла рази ишривукан. Дугъриданна, жвуван багъри гъул, район гъибтну гьамци жара йишваз Ислам дин тарабгъуз гъюб, имбу мусурман ксариз илим улупуз гъюб заан ва Аллагьу Тааьла рази шлу ляхнарикан ву. Аллагьу Тааьлайикан увуз ва яв хизандиз жандин сагъвал, кlван шадвал ва уьмриъ хъуркьувалар ккун апlурача. Гъит уву апlру ляхниъ гьарган берекет, шадвал ва Аллагьу Тааьлайин разивал ибшри. Узуз сар фулану кас жвуван багъри юрдар дирчну жара йишваз дин тарабгъуз гъушну кlури ебхьруган, гизаф шад шулза. Учву апlурайи ляхин Пайгъамбарин ва асгьябарин рякъ давам апlувал ву. Баракаллагь, чухсагъул. Мицдар илимлу баяр ади Хив райондиъ Ислам дин йигълан-йигъаз гужал шул кlури, умуд кайихь.

Сюгьбат гъубхур Аьзиз Рашидов