Палестина кlваълан дубшнадар
Палестина кlваълан дубшнадар
Мусурман кас чавсир жара мусурман касдихъан юкlв убгрур духьну ккунду. Эгер сану мусурман читинвалиъ ади, тмунуриз дугъкан фикир ктарш, дицир касдин иман тамам вуйиб дар.
Палестинайиъ йихувалар давам шули магьа фукьан вахт ву. Гьарсар кlваъ саб тикисибкьан иман айи касдихьан му ляхниз юкlв сикинди лигуз шулдар. Дерд-хажалат кайи вахтна гьарсар мусурман анжагъ Аллагьу Тааьлайихьна илтlикlуру, гьаз гъапиш вари шулайиб Сар Аллагьдин ﷻ кьадарнииндитlан шулайиб дар.
«Дюаь мусурман касдин яракь ву» - гьамци дупна Пагъамбарин ﷺ гьядисдиъ. Гьаму гьядисдиз тялукь вуди варидагъустандиъ кми-кмиди гьарйигъан ихь Палестина ва Гъаззайиъ айи мусурмнарихъан мистариъ дюъйир апlура.
Гьар йигъан гвачlниндин гъудгниъ, Мягьячгъала шагьрин кlулин мистан уч духьнайи мусурмнари тамамди абцlну, дюаь апlури шулу. Гьар йигъан гвачlниндин гъудгнин кьяляхъ уч духьнайидарин улихь аьлимар удучIвну улхуру, инсанарин суалариз жавабар тувру ва гьацира мусурмнарин арайиъ дубхьну ккуни гьякь-гьюрматнакан ктибтуру.
Каспийск шагьриъра гьяфтайиъ фулану йигъари уч духьну гвачlниндин гъудгнихъан дюаь апlури шулу.
Дербент ва Огни шагьрариъ аьлимарин мажлисар гъахьну ва гьадму мажлисариъ гизаф халкь уч гъахьи вахтна дюаьра гъапlну.
Табасаран райондиъ гьар султ йигъан сабуну гъулаъ уч духьну, жямяаьтдихъди гвачlниндин гъудган дапlну, дюаь апlуру. Думутlанна гъайри, гъудгнин кьяляхъ уч духьнайидарин улихь имамарикан-аьлимарикан сар улхуру. Гьациб къайдайиинди магьа Гурихъ, Асккан Ягъдигъ, Заан Ягъдигъ, Ерси, Чвулат, Гувлигъ, Гуми, Гурихъ, Дагъни, Гьепlил гъулариъ му серенжемар кlулиъ гъушну. Имбу гъулариъра гьар султ йигъан мицдар серенжемар кlули гъахуз ният а.
Хив райондиъра кми-кмиди мицдар мажлисар кlули гъахура. Гьамдиинди Дагъустандиъ яшамиш шулайи мусурмнари чпин Палестинайиъ ва Гъаззайиъ айи мусурмнарихъан дюаь апlура.
Гъит Аллагьу Тааьлайи ихь варидарин гъапlу гъудгнар, ибадат ва ухьу апlурайи дюъйир кьабул дапlну, гъи читин гьялнаъ айи мусурмнар азад апlри, гъит дураризра, ухьузра ислягьвал ибшри!
