Рамазан-2022. Натижйир!
Хив райондин ифтIар
Хив райондин Хив гъулаъ «Мердешан» кIуру залиъ варирайондин ифтIар кIули гъубшну. Мушваз райондин глава Ярмет Ярметов, карханйирин вакилар, райондин вари гъулариан имамар ва гьацира инсанар-хялар уч духьнайи. Дупну ккундуки, му вазли кмикмиди вари гъулариъ чпин гъуларин кIул`инди вуйи ифтIарарра гъахьну.
Гьаци вушра, магьа райондин ифтIариз гизаф инсанар уч гъахьнийи. Мушваъ улхрудари варидари чиб-чпи тебрик апIури, уч духьнайидариз ужудар насигьятар туври, улхбарин арайиъ нашидар-мавлидар урхури, ифтIар заан дережайиинди кIулиз адабгъну. Ккун апIурахьа Аллагьу Тааьлайикан гъюру Рамазандин вазлизра ухьуз сагъвал тувуб ва гьамци заан дережайиинди ифтIарар кIули гъахьузра мумкинвал тувуб
Табасаран райондин ифтIар
Хючна гъулан ургур чвуччвунна сар чуччун гъалайиъ варирайондин ифтIар кIули гъубшну. Му ифтIариъ райондин глава Мягьямед Къурбанов, имамарин Советдин председатель Ансар Рамазанов ва гьацира гизаф инсанар иштирак гъахьнийи. Гьарсар улхурайири гьамусяаьт Украинайи айи ихь жигьилар сагъсаламатди гъюз дюаь апIури, дурарихъан юкIв убгури гафар гъапIнийи.
Табасаран райондин имам Ансар Рамазановди му чан улхбаъ инсанарин арайиъ футна ипри лицурайи агьларикан, дурарин гьялнакан ва фици дурарихьан ярхла духьну ккундуш, ктибтну. Хъа йисари хъанара заан дережайиинди мицдар мажлисар кIули гъягъюр кIури, умуд киврахьа.
Жигьиларин ифтIар духовный центриъ
Дагъустандин тарихдиъ сабпи ражари вуди вари шагьрар-гъулариан уч духьну, Духовный центриъ жигьиларин ифтIар кIули гъубшну. Му серенжемдиз гизаф кьадар инсанар уч гъахьну. Гьарсар улхурайири гъийин йигъаз жигьилариз заан фикир тувну ккуниваликан гъапну. Гьаз гъапиш, гьамус гьеле сабан жигьилди имбудар хъасин гележегдиъ ихь уьмрин ляхнарин улихь хьиди.
Гьаддиз дурарин тербияйин, дурарин апIру гаф-чIалнан ухьу гьеле дурар бицIиди имидитIан гагьди фикир тувну ккунду. Гьамцдар серенжемар кIулиз адагъури ихь Муфтиятди гизаф ляхин гъабхура. Гъит Аллагьу Тааьлайи гьарсар касди алдабгъу лик женнетдиъ айиб ибшри, ихь гележег акуб ибшри, ихь веледариз сагъвал туври, гьич сабанра ухьу чIуру рякъюъди гъягъру агьларикан дарапIри! Амин!
figure>
ИЛЬЯС РАСУЛОВ
