Рабиуль авваль – 2022
Рабиуль авваль – 2022
Гьямд ибшри Аллагьу Тааьлайиз ухьу мусурмнар вуди, Пайгъамбарин ﷺ умматдикан вуди халкь апIбаз. Дугъриданна, гизафдар мидин гъаври адар, амма му ляхин Аллагьу Тааьлайин ухьухьна вуйи рягьимлувалин лишан ву.
Пайгъамбар ﷺ бабкан гъахьи ваз ккудубкIну. Му вазли ихь гьюкуматдин жюрбежюр йишвариъ Пайгъамбарин ﷺ тяриф апIбан мажлисар кIули гъушну.
Саб Дагъустандиъси, жара йишвариъра мажлисар апIури, Аллагьу Тааьла ва Пайгъамбар ﷺ кIваин апIбан серенжемар гъахьну.
Му мажлисарикан табасаран халкьдин варитIан аьхю мажлиз гьамусяаьт тикмиш апIурайи Мягьячгъала ва Каспийск шагьрарин арайиъ айи Мугьяммад пайгъамбрин ччвурнахъ хъайи мистаъ гъабхьну.
Му мажлисназ Табасаран ва Хив районариан, Дербент, Огни, Мягьячгъала ва Каспийск шагьрариан гизаф инсанар уч гъафну.
Ярхла рякъди дуфнайидар ипIрубдихъди тямин апIбан бадали, гвачIниантIан му мажлисназ гьязурлугарихъ хъюгънийи. Магьа хябяхъган мажлис ккебгъайиз, 4 агъзурихьна инсанариз ипIруб гьязур дапIну дебккнийи.
Магьа мажлис ккебгъу. Мажлис кIули гъабхурайир Билижи гъулан имам Ризван Гьябибов вуйи. Мажлис ачмиш апIури, думу касди мицдар мажлисарикан айи заан мянфяаьтнакан яркьуди ктибту.
Мугьяммад-Шафи Ашуровди гирами Каламдиан аятар урхбиинди му мажлис ачмиш гъапIу.
Сарпир вуди гаф Хив райондин имам Шябан Салиховдиз туву.
«Гьюрматлу гъардшар ва чйир! Сабпи нубатнаан учвуз аьхю чухсагъул му мажлиснаъ иштирак хьпан. Гьамдиинди ухьу Пайгъамбарихьна вуйи ккунивал улупурахьа. Ав, Пайгъамбарин ﷺ тяриф апIувал ухь’ин али заан дережайин ляхнарикан ву. Гъит Аллагьу Тааьлайи му мажлис тешкил апIуз себеб гъахьи инсанариз, садакьа тувдариз аьхю ужувлар туври», - гъапну Шябан Салиховди.
Дагъустандин Муфтийин заместитель Аьгьмад Мягьаммадовди Муфтий шейх Аьгьмад афандийин терефнаан вари уч духьнайидар гирами вазлихъди тебрик гъапIну ва чан улхбаъ Пайгъамбарин ﷺ ухьухьна вуйи ккуниваликан, ужудар гъиллигъарикан ктибтну.
Мягьячгъала шагьрин кIулин мистан имам Мугьяммад-ТIагьир Аьгьмадовди чан улхбаъ Пайгъамбарин ﷺ инсанарихьна вуйи ккуниваликан яркьуди ктибтну.
«Пайгъамбар ﷺ инсанарихьна ижми рягьимлувал айир гъахьну. Гьарсар касдихъан дерд апIрур гъахьну, гьич сар каскьан читинвалиъ гъитри гъахьундар. Яшлуйир, жигьилар, бицIидар – мурарикан гьарурихьна рягьимлувал ади, ккунивал ади гъахьир ву», - гъапну Мягьячгъала шагьрин кIулин мистан имамди.
Огни шагьрин кIулин мистан имам Мугьяммад-Рамазан Ражабовди вари уч духьнайидар гирами вазлихъди тебрик гъапIну ва инсан ужудар ляхнар артухъси апIуз чалишмиш духьну ккуниваликан ктибтну.
Улхбарин арайиъ нашидар, назмйир ва бицIидари шиърар гъурхну.
Думу шиърар урхурайидарикан сану бицIи шуру адашиз бахш дапIнайи шиир гъурхнийи. Дидин мянара, Украинайиз душнайи чпин адашиз ккилигурача, пуб вуйи, шиирра «Ккилигурача увуз адаш» кIуру гафарилан ккебгънийи. Хъа му бицIи шуракна дадайи, адаш кечмиш духьна кIури, гьеле сабан дупнадайи. Му шиир урхруган, гизафдарин уларилан нивгъар гъагъюз хъюгънийи. Гъит Аллагьу Тааьлайи гъи читин гьялнаъ айидариз кюмек туври.
Улхбарин арайиъ жюрбежюр пешкешар туври, розыгрышар апIури гъахьну. Му мажлиснаъ пешкеш вуди уьмрайиз шубуб путевка тувну. Дурарикан саб «Уьмра-гьяж» проектди чпин терефнаан тувуб вуйи. Гъит Аллагьу Тааьла чпикан рази ишри. Дурарикан сабуну путевка Казан шагьриан дуфнайи туристариз кьисмат гъабхьи. Дурар чпи Дербент шагьриъ айиган, гьадушваъ сарихъди таниш духьну, вари сатIиди мажлисназ гъафну, ва гьаму 4 агъзурихьна инсанарин арайиан Аллагьу Тааьлайин амриинди сабуну путевка гьадму дишагьлийиз кьисмат гъабхьну. Сягьнайиина удучIган, уларилан нивгъар гъягъюри, гафаркьан апIуз шуладайи, гьадмукьан шад гъахьнийи. Хъа ухьура ихь терефнаан, му путевка ихь мажлисназ дуфнайи хялариз кьисмат хьуб`ин гизаф рази вухьа. Гъит Аллагьу Тааьлайи уьмра кьисмат гъабхьидариз сагъ-саламатди душну, уьмра тамам дапIну кьяляхъ гъюру агьларикан апIри.
Мажлиснан аьхириъ Табасаран райондин имам Ансар Рамазановдиз гаф тувну.
«Аьзиз ватанагьлийир, дуфнайи хялар, имамар ва аьлимар! Гъит Аллагьу Тааьлайи ичв алдагъу ликар женнетдиъ айидар ишри, ичв хизанариъ шадвалар, бахтар-ужувлар ишри. Гъи му мажлиснаъ иштирак шулайидар, дугъриданна, Пайгъамбар ﷺ ккунидар ву кIури, якьинди пуз шулу. Пайгъамбар ﷺ бабкан гъахьи вазли, пайгъамбарин ﷺ тяриф апIуз уч духьнахьа. Ухьуз Аллагьу Тааьлайи варитIан заанди дерккнайир, варитIан ухьуз ккунир ва ухьу ккунир, варитIар рягьимлур ва варитIан ухьхъан юкIв убгрур - ари гьамцир кас кIваин апIуз дуфнахьа. Гьяйифки, гъи саспи жигьилариз ухьу гьамци уч шлуган, Пайгъамбарин ﷺ тяриф апIруган, кьабул шулдар, му бидаь ву, кIури шулу, хъа дицистар инсанариз фикир тувидархьа, дурарин му гафар чпиз диндин аьгъювалар адрувалиан кIурайидар ву, дурар диндин гъаври адар, гьеле чпин гъаври ача кIури фикир вушра. Гьаддиз ухьу дицдариз дилигди гьамцдар мажлисариъ иштирак шули, ужувлан ляхнар артухъди апIури, Аллагьу Тааьлайихьна багахь хьуз чалишмиш духьну ккунду. Гъит Аллагьу Тааьлайи му мажлис кIулиз адабгъуз себеб гъахьи вари инсанариз ужувлар, бахтар туври, туву садакьйир кьабул апIури, гьякь рякъ’ин мудам апIри ва анжагъ ужувлан ляхнар апIру инсанарикан ишри», - гъапну Ансар Рамазановди.
Магьа гьамци заан дережайиинди табасаран халкьдин нубатнан мажлис кIули гъубшну. Му мажлиснакан аьхю мянфяаьт гъабхьну. Думу инсанариз лап кьабул гъабхьну ва тешкилатчйирикан вахт-вахтарик гьамцдар мажлисар кIули гъахуб, инсанар уч апIуб ккун гъапIну.
Дупну ккундуки, му гирами вазли ихь кьюби районариъра, ихь табасаранлуйир яшамиш шулайи шагьрариъра мицдар серенжемар гизаф гъахьну. Гьарсаб йишваъ му ляхнар заан дережайиинди кIули гъахури, ужудар вязйир-насигьятар туври гъахьну.
Аьхириъ пуз ккундузузки, гъит Аллагьу Тааьла му ужувлан ляхнарин улихь хьайидарикан, мушваъ иштирак гъахьидарикан рази ишри. Чпин хулариъ, хизанариъ берекет ибшри ва гележегдиъра ухьу гьамцдар ужувлан ляхнариъ иштирак шлу агьларикан ишри. Амин!
