Табасаран ва Хив районариъ мажлисар
Табасаран ва Хив районариъ мажлисар
Гьямд ибшри Аллагьу Тааьлайиз, ихь районар диндихьна аьшкь айидар, дин ккунидар ва диндикан вуйи серенжемариъ ижмиди иштирак шлудар ву.
Гирами Рабиуль аввалин ваз ккебгъайизра ва ккебхъанминара магьа кми-кмиди гьарйигъан ихь районариъ мажлисар кIули гъягъюра. Думу мажлисариъ имамари, аьлимари ихь халкьдин гирами Каламдиан аятар хури, Пайгъамбарин ﷺ гьядисар кIваин апIури шулу.
АхьитI гъулан мажлис
Сентябрь вазлиъ АхьитI гъулаъ аьхю серенжем кIули гъубшну. Дупну ккундуки, мажлисназ му гъул’ан удучIвну гъушдарра кмиди дуфнайи.
Мажлис ачмиш апIури, АхьитI гъулан имам Аьгьмадпаша Гьяжиевди вари уч духьнайидариз, хусуси вуди гъул-жямяаьтдиз, гъулан главайиз ва му мажлис арайиз хуз себеб гъахьи гьарсар касдиз чухсагъул гъапну.
Гъулан имамди чан терефнаан ужувлан ляхнариз кюмек тувбан гъулан глава Рустам Шихмагомедовдиз «Аферинвалин кагъаз» тувну, думутIанна гъайри, читин уьзур айи вахтна гизаф зегьмет гъизигу гъулан фельдшер Фариде Гасанбековайизра пешкеш тувну.
Гъулан имамдихьан мектебдиъ лихурайи мялимари зигурайи зегьметра фикир тутрувди гъидрибтбаз лайикь ву, гьаддиз вари коллективдиз кIури, саб уткан пешкеш школайин директор Аьли Гульмагомедовдихьнара тувну.
Гъулан глава Рустам Шихмагомедовди, сабпи нубатнаан, гъулан имам Аьгьмадпаша Гьяжиевдиз ва райондин имам Ансар Рамазановдиз мицдар серенжемар тешкил апIбан ва вари райондиъ гъабхурайи ляхнин аьхю чухсагъул гъапну.
«Узу, йиз вари ляхнар дирчну, гъулан серенжемдиз гъафунза. Мициб мумкинвал ухьу ккадапIну ккундар. Ихь жямаьтдин ляхнариъ иштирак духьну ккунду. Му мажлис тешкил гъапIдаризра аьхю чухсагъул вуйиз» - гъапну Мягьячгъала шагьрин ветеренарин Советдин председатель Ферзулла Кахримановди.
Мажлисдин аьхириъ райондин имам Ансар Рамазановди гъулан имам Аьгьмадпаша Гьяжиевдиз, гъулан глава Рустам Шихмагомедовдиз чухсагъул мялум гъапIну. Хъа гъулан агъсакъал, образованиейин отличник, гизаф йисари школайиъ мялимвал гъапIу, гизаф йисари жямаьтдин имамвал гъапIу Гьюсейн халу 80 йис тамам хьпахъди тебрик гъапIну ва дугъаз пешкешра тувну.
ЧвулатI гъулаъ аьхю мажлис
ЧвулатI гъул кIваз лап хуш шлу гъуларикан саб ву. Аьхиримжи йисари цIийи имам Аьгьмад Сеферовди му гъул-жямяаьтдин арайиъ ужуб ляхин гъабхура. Мавлидар-мажлисар апIури, гьарсаб хизандиз гъягъюри, дурарихь ихь газатдиз подписка апIуз мумкинвал туври, ужудар аьлакьйир уьрхюра.
Магьа гьаму ражнура вари жямяаьт уч духьну, варидари сатIиди зикир апIури, салаватар хури, имамар-аьлимарин вязйирихъ хъпехъури гъахьну.
Мажлис кIули гъабхурайи гъулан имам Аьгьмад Сеферовди мицдар мажлисарин заанваликан ктибтну.
Гъулан глава Герейхан Шурейхановичди чан терефнаан му мажлиснахъди вари тебрик гъапIну ва, дугъриданна, цIийи имам Аьгьмад Сеферов гъафихъанмина гизаф ужувлан терефназди дигиш’валар арайиз дуфна, кIури, тасдикь гъапIну.
Имамарин-аьлимарин арайиъ бицIидарихъ вуйи суалар хъирчри, жаваб тувдариз пешкешар туври гъахьну.
Мажлиснаъ гьацира Сиртыч гъулан имам Аьбдурашид Шихбабаев, Гурихъ гъулан имам Гьяжисефер халу, ЖагътIил гъулан имам Гьясанаьли халу, ГьепIил гъулан имам Аьбдулла Аьлиев ва гь. ж имамар, аьлимар иштирак гъахьну.
Мажлис дюаь апIбиинди, Аллагьу Тааьлайикан ихь гьаму вахтна читин гьялнаъ айи баяр сагъ-саламатди кьяляхъ гъюб ккун апIбиинди ккудубкIну.
Шейх Зияуддин Юсуф гьяжи кечмиш духьну 90 йис
Гурихъ гъул аьлимарин багъ ву. Мушваъ шейхар, аьлимар ади, саб табасарандиан ваъ, варидагъустандин жюрбежюр йишвариан диндин аьгъювалар, тIарикьатдин берекет гъадабгъуз гъюру йишв гъабхьну.
Думу шейхар, аьлимарикан заан йишв ихь табасаран халкьдин тарихдиъ Зияуддин Юсуф гьяжийи бисура.
Аьхиримжи йисари магьа, му касдиз бахш вуди, мажлисар кIули гъахура.
25-пи сентябри Табасаран райондин Гурихъ гъулаз жюрбежюр йишвариан инсанар уч гъахьну. Дурарикан гьаруриз шейхдин уьмрикан хъанара артухъ ебхьуз ккунди, дугъан уьмур ахтармиш апIуз ккунди ва дугъан накьвдихъна зиярат дапIну, дюаь апIуз кIури гизафдар гъафну.
Мажлис ачмиш апIури Гурихъ гъулан имамди тIарикьат фу-вуш, тIарикьатдиз фицдар цирклар аш, яркьуди ктибтну.
Зияуддин Юсуф гьяжийин хтул, адлу аьлим Гьясамуддин халуйин бай Юсуф гьяжийи лапра яркьуди чпин абйирин рякъкан ктибтну.
«Думуган читин вахтар вуйи, ипIруб адайи. Гъийин йигъанси диндиз рякъяр ачмишди дайи. Му себебариз дилигди, ич абайи, ихь шейхди му халкьдин арайиъ дин тарабгъбан, тIарикьат ади хьпан гьякьнаан гизаф ляхин гъубхну. Учвуз варидариз Аллагь ﷻ бадали ич аба, ихь шейх кIваин дапIну му мажлисназ уч хьпан аьхю чухсагъул вуйиз» - гъапну шейхдин хутли.
Мажлисдиъ жюрбежюр гъулариан, шагьрариан вуйи имамар-аьлимарра удучIвну гъулхну.
Мажлисдин аьхириъ райондин имам Ансар Рамазанов жямяаьтдихьна илтIикIну.
«Гьюрматлу Гурихъ гъулан жямяаьт ва дуфнайи хялар! Гьямд ибшри Аллагьу Тааьлайиз ухьуз мициб мумкинвал тувбаз. Мицдар аьлимар, шейхар кIваин апIуб ухь’ин али буржи ву. Мицдар инсанар ихь халкьдин ва варидагъустандин тарихдиъ зурба шил гъибту инсанар ву. Гьаддиз гъи Гурихъ гъулан жямяаьтдикан ккун апIураза, эгер гьеле вари гъулариъ диндин ляхин аьжуз гъабхьишра, му гъулаъ дубхьну ккундар, гьаз гъапиш эгер ухьуз, дугъриданна, му шейхар, аьлимар ккундуш, ухьу кIваантIан му диндихъан, мурари гъабхури гъахьи ляхнихъан хъичIихну гъузну ккунду. Ичв веледариз, бицIидариз му касдикан мялуматар тувай, мицдар аьлимар, чпин жан гъурбан дапIну, ухьухьна Ислам дин гъурубкьу ксар ву», - къайд гъапIну райондин имамди.
Мажлис ккудубкIбан кьяляхъ вари сатIиди Зияуддин Юсуф гьяжийин зияратназ гъушну ва душвахь «Мульк» сура дурхну, вари кечмиш духьнайидариз бахш дапIну, ихь ватандиъ ислягьвал хьувалин дюаь гъапIну.
Гъит Аллагьу Тааьлайи ухьу мицдар ксарин берекетнахъ мягьрум дарапIри! Амин!
Асккан Яракк гъулаъ мажлис
Хив райондин Асккан Яракк гъулан мистазди учвган, мушваъ ккабалгнайивалар гъяркъган, гъулан имам Гьяжияр халуйиз чан жямяаьт кIваантIан ккуниб аьгъю шуйи.
Магьа лавландин гъудган мистаъ дапIну, яваш-явашди гъулан клубдизди инсанар уч хьуз хъюгъю.
Гирами Каламдиан Заур Салиховди аятар дурхну му гюрчег мажлис ачмиш гъапIу.
Хив райондин имам Шябан Салиховди вари уч духьнайидариз, гъулан улихь-кIулиъ айидариз, имамдиз мициб мажлис тешкил апIбан чухсагъул къайд гъапIу.
Гьарсар имам-аьлимди чпин улхбариъ гъийин йигъан учIруди дугъужвнайи месэлйирикан гъулхну, хусуси вуди уч духьнайидариз диндиъ айи мусурмнарин гъардаш’валикан, футнйирихьан ярхла духьну ккуниваликан ва гъудгнар апIувалин ва ушв бисувалин фарзарикан ктибтну.
«Ухьу фукьан му жилиин яшамиш гъахьишра сад йигъан му дюн’я дипрудар вухьа. Гьичра дидкан кIваълан магьапIанай. Гьацира ихь жигьиларихьна илтIикIури пуз ккундузуз, учву апIру ляхнариъ гьялак махьанай, чIуру рякънахьан ярхла йихьай, интернетдиъ айи «аьлимарихъ» хъпехъуб герек адар. Ухьуз ва ихь жямяаьтдиз герек вуйи илим тувуз ихь райондиъ диндин аьгъювалар айи, ужудар илим кайи имамар-аьлимар айихь», - гъапну Хив райондин имам Шябан Салиховди.
Хив райондиъ айи «Инсан» фонддин вакил Аьбдулла гьяжийи уч духьнайидариз му фондди фициб ляхин гъабхураш, гъийин йигъаз фициб кьадар инсанариз кюмек дапIнаш ктибтну.
Дупну ккундуки Хив райондин имбу гъулариъра гьамцдар ужувлан мажлисар кIули гъягъюра. Гъит Аллагьу Тааьлайи ухьуз артухъси ужувлар туври! Амин
