Рабиуль авваль 2023
Рабиуль авваль 2023
Магьа сабсан ваз, Гирами Мугьяммад пайгъамбар бабкан гъахьи Раби уль-аввал, ихь уьмриан гъубшну, дидихъди сабси ухьуз Аллагьу Тааьлайи му жилиин яшамиш хьуз улупнайи кьадар йигъарра цlиб гъахьну.
Гьар йисан Пайгъамбар ﷺ бабкан гъахьи ваз улубкьган, вари Дагъустандиъси, Урусиятдинра саспи йишвариъ Пайгъамбарин ﷺ уьмрикан мялумат тувру серенжемар кlули гъахури шулу.
Магьа гьаму йисанра думу ляхин заан дережайиинди кlули гъубшну.
Табасаран район
Табасаран райондин тамам вари гъулариъ чпин жямаьтари тешкил гъапlу мажлисар кlули гъушну. Дидихъди сабси гъи читинвалариъ айидариз дюаь апlури, мюгьтаж’валиъ айидариз кюмек туври, Пайгъамбарин ﷺ уьмрикан ктибтури гъахьну. Му вазли Табасаран райондин аьхю мажлис Гьесихъ гъулаъ гъабхьну ва душваз вари йишвариан инсанар уч гъахьнийи.
Гьямд ибшри Аллагьу Тааьлайиз, му вазли Пайгъамбариина ﷺ салаватар хури, мистариъ Мугьяммад пайгъамбарин уьмрикан ктибтури гъахьну.
Хив район
Хив райондин диндин улихь хьайи регьбрари гьарйигъан жюрбежюр гъулариъ диндиз бахш дапIнайи серенжемар гъухну. Гьарсаб гъулаъ мажлис апlуруган, жямяаьтдин арайиъ айи учlру месэлйиризра фикир туври, уч духьнайидарин суалариз жаваб туври, бицlидарин арайиъ жюрбежюр талитар кlули гъахури – гьациб къайдайиинди му гирами ваз адапlну.
Гъит Аллагьу Тааьлайи вари мажлисар кьабул апlури.
Дербент
Дербент шагьрин кlулин площаддиин аьхю мажлис кlули гъубшну. Душваъ уч духьнайидариз аьлимари гъийин заманайиъ учlруди дугъужвнайи месэлйирикан яркьуди ктибтну.
Дербент шагьрин ва Дербент райондин имамарин советдин председатель Аьбдулла Маликовди, уч духьнайидарихьна илтlикlну, мицдар мажлисарикан айи мянфяаьтнакан яркьуди ктибтну.
Думутlанна гъайри, уч духьнайидарин арайиъ Уьмрайиз путёвкара ипну. Думу путёвка Табасаран райондин Жагътlил гъулан агьали Нурлан Мурадалиевдиз кьисмат гъабхьну.
Каспийск
Каспийск шагьриъ гизаф табасаранар дуламиш шула, гьаддиз му шагьриъра аьхю серенжем заан къайдайиинди гъубшну.
Гирами Каламдиан шейх Ибрагьим аз-Зубайжийи аятар урхбиинди му серенжем ачмиш гъапlну. Мажлис кlулиъ гъабхурайир Табасаран райондин имамарин советдин председатель Ансар Рамазанов вуйи.
Мажлиснаъ иштирак шулайи Хив райондин имам Шябан Салиховди, Каспийск шагьриъ яшамиш шулайи ихь ватанагьлийир Халитдин халуйи, Нажмутдин халуйи ва имбудари чпин улхбариъ ухьу фици Пайгъамбар ﷺ ккун дапlну ккундуш, дугъахьна вуйи мугьюббатвал ухьу фици улупну ккундуш, яркьуди ктибтну. Улхбарин арайиъ ихь чlалниинди назмарра гъурхну.
Мягьячгъала
Мягьячгъала шагьрин площаддиин вариреспубликайин аьхю мажлис кlули гъубшну. Му мажлиснаъ ихь республикайин вари шагьрар-районариан инсанар уч духьнайи. Мажлиснаъ назмар урхури, Аллагьу Тааьла зикир апlури, Пайгъамбариина ﷺ салаватар хури, аьлимари вязйир апlури гъахьну.
Дупну ккундуки, думу мажлисназ варидагъустандиан 20 агъзурихьна инсанар уч гъахьнийи. Гьаддиинди ихь республикайиъ айи мусурмнари чпин Аллагьу Тааьлайихьна ва Пайгъамбарихьна ﷺ вуйи ккунивал улупну.
Москва
Москва шагьриъ йисан кьюб ражари табасаранлуйирин серенжемар кlули гъягъюру – Раби уль-аввалин ва Рамазандин вазариъ. Мицдар зурба шагьрариъ ихь ватанагьлийир аьхю аьшкьниинди уч шулу, фицики мушваъ, саб кlуруб, ужуб вяаьз-насигьят ебхьуру, кьюб кlуруб, фукьан вахтна чиб-чпиз дярякърайи ватанагьлийир рякъюру.
Гьаци вуйиган, ихь имамар-аьлимарра йисан кьюб ражари Москва шагьриз душну, ихь ватанагьлийирихъди гюрюшмиш шулу ва гьаддиинди аьхю мянфяаьт хуру.
Гъит Аллагьу Тааьлайи му гирами вазли гъапlу вари мажлисар кьабул апlри, гъит гъи читин гьялнаъ айи мусурман чвйир-чйириз Аллагь ﷻ кюмек ишри.
Гележег ужуб, акуб ва Аллагьу Тааьла рази шлуб ибшри.
