Суал-жаваб

Хпирикан гьапlруш аьжуз духьназу. Гизаф сабур апlураза. Гьарган йиз дадайилан чlуру гафар кlуру, гьар ражари, узу хулазди учlвубси, йиз хизанарилан фу-вушра пуз хъюгъру. Фукьан сабур апlурухъа?! Йиз веледарин гьюрматнаан сабур апlураза, амма сабур ккудубкlура. Эгер узу хпирихьан жара гъахьиш, фици шуйкlан?

Гьарсаб хизандиъ жюрбежюр читинвалар ади шулу. Яв дюшюшдиъ, сабпи нубатнаан, гьаз хпири дици кlураш, аьгъю дапlну ккунду. Ав, я жилириз, ясана хпириз чиб-чпин абйир-бабарилан чlуруб пуз шариаьтди ихтияр туврадар. Уву кlуру гафариан хпири гьарган чlуруди улхурайиб аьгъю шула. Дици хай шулдар. Эгер жилирин дадайик саб фукlа тахсир каш, дусну гаф-чlал дапlну, саб мясляаьтнахъна дуфну ккун. Увура сабур апlурава, ва дидин Аллагьу Тааьлайин улихь аьхю саваб хьибди. Сабурлувалиинди яв хпирихьан,  дадайилан гьаму чlуру гафар гьаз кlурава дупну, аьгъю апlин. Наънан тахсир ктубчlвураш, аьгъю дапlну, гьадму нукьсанвал кайириз насигьятнан гаф дапlну ккун. Гьалак махьан. Хизан ккидипуб - саб, амма хъасин швумал шлуганси дапIну ккундар. Сабурлувалихъ хъубкьруб гьич фукlара адар. Эгер гьаму ухьу ктуху ляхнар тамам апlбан кьяляхъра дигиш’валар адарш, аьлим касдихьна душну, гаф-чlал апlин. Гъит Аллагьу Тааьлайи ичв хизандиз берекет, бахт ва ужувлар туври.

Йиз хуларихьан 150 метр манзил ади, мист хьа. Гьар гъудгниз гъягъюз шулдар, хъа гвачlниндин, лавлан ва хъитlирхбандин гъудгнаризкьан гъягъюз чалишмиш шулаза. Амма саб читинвал азуз. Йиз хулаъ айидар думу ляхниз къаршу ву. Уву жигьил кас вува, хулаъ вушра гъудган апlуз шулу кlури, узуз кьабул дару гафар апlури шулу. Гьаму дюшюшдиъ узу фу гъапlиш ужи ву: дурарихъ хъебехъну хулаъ гъудган апIурин, дарш мистаъ жямяаьтдихъди?

- МашаАллагь, хуларин багахь мист хьайивал аьхю ниъматарикан ву. Яни учву мистан гъуншйир шулачва. Му дюшюшдиъ хулаъ айидариз мистаъ жямяаьтдихъди гъудган апlбан заанваликан мялумат тувну ккун. Хъа дурари, уву гьеле жигьилди имива, кlуру гафариз гьамци жаваб тувну ккун: думу ляхин ари жигьилди имиди кlулиз адабгъуз хъюгъну ккуниб ву. Яшариз илтlикlган, жигьилганси хъайи-хъайиси фарзар, суннатар апlуз шулдар. Гьаддиз сабурлувалиинди дурариз Аллагьу Тааьлайи тувнайи му ниъматдикан кидибтну ккун. Чиб-чпиз гиран шлу саягъниинди ваъ, хъа кьюбиб терефарра рази шлу къайдайиинди. Гъит Аллагьу Тааьлайи увузра, хулаъ айидаризра жямяаьтдихъди мистаъ гъудгнар апlуз кюмек туври.

Узу Хив райондиъ яшамиш шулаза. Йиз гъуншйирикан, мурари кми-кмиди апlури шлу Аллагь рази дару ляхнарикан инжиг духьназу. Гьяфтайиъ саб ражарикьан фалчйирихьна дурушди гъузрадар. Фуну ляхин гъабхьишра, дурарин сабпи кюмек фалчийихьан ву. Гьаму йиз хизанра ужуб гьялнаъ гъибтрадар. Инсан аьзарлу гъахьишра кмиди, дишлади фалчийихьна гъягъюру. Гъуншйириз чlуру кlажар апlуру. Гьаму дюшюшдиъ фу дапIну ккунду?

Гьяйифки, му ляхин саб бязи хизанариъ кми-кмиди ишлетмиш апlурайи шулу. Гьеле аьлимари, имамари фалчйирихьна гъягъбакан айи гунагьнан гьякьнаан кlурашра, думу чIуру ляхин вуйибдикан газатариъ макьалйир дикlурашра, дурар гъаври шуладар. Аллагьу Тааьлайин улихь аьхю гунагьнан аьгьлийир шула. Фалчийи кlурубдихъ хъугъували инсан Аллагьу Тааьлайихьан ярхла апlуру. Дицир кас Аллагьу Тааьлайихъ хъугърадар, фалчийихъ хъугъра. Вари ихь уьмриъ шулайиб анжагъ Аллагьу Тааьлайин амриинди шулайиб ву ва сар фалчийихьанра, ясана жара касдихьанра думу дигиш апlуз шлуб дар. Эгер дицдар ксар гъулаъ аш, учву гъулан имамдихьна, аьлимарихьна илтlикlну ккунду, хъа дурари чпин терефнаан фалчйирихьна гъягъбан айи гъагънакан ктибтуру. Дицдар ксарихьан ярхла духьну ккунду, дурар Аллагьу Тааьлайин хъял чпиина гъадабгъурайидар ву.

Сар касдихьна 300 агъзур манат буржди тувунза. Пул тувруган, сад йисазди кlури йикьрар гъабхьну. Магьа кьюд йистlан артухъ ккудубшну, амма пул кьяляхъ апlурадар. Дугъаз пулра адар пуз шулдар, зурба хал, багьа машин а. Гьаму дюшюшдиъ фу дапlну ккун.

Му суалнаан гъаври шулаки, думу касдиз Аллагьу Тааьлайихьан гучl ктар, дугъаз буржнан гьякьнаан вуйи Пайгъамбарин ﷺ гьядисар аьгъдар. Белки агъядира шул, амма думу ляхнин жавабдарваликан аьгъдар. Гьаму дюшюшдиъ думу кечмиш гъахьиш, Аллагьу Тааьлайин улихь фици жаваб тувди? Ав, эгер мумкинвал адарш, думу жара месэла ву, амма гьадмуганра кмиди дугъу бурж кьяляхъ тувуз мумкинвалар дагну ккун. Хъа жвуваз аьхю дараматарра ади, багьа машинра ади, тмуну касдин бурж тутрувувал ужи дар. Гьаддиз, сабпи нубатнаан, дугъаз Аллагьу Тааьлайин улихь вуйи жавабдарваликан кидибтну ккунду. Гъит Аллагь кюмек ишри.