Суал-жаваб

- Ич гъулан имамди улихь йисанра, гьаму йисанра Рамазандин ваз ккебгъруган ва ккудубкlруган, чаз ккуниси гьюкум адабгъура. Магьа гьаму йисанра ушвин ваз сад йигъ улихьна ккебгъну, ва гьаддиан ич жямяаьт гьамусяаьт кьюб тереф духьна. Гьаму дюшюшдиъ аьдати инсанари фу дапlну ккун?

- Гьяйифки, саспи имамар, я чпи ваз рябкъювализ лигурадар, ясана гъилигдари гъапибдихъди гъягъюрадар. Гьаддиз жямяаьтдин арайихъ наразиваларра артухъ шула. Ихь республикайин йисариинди думу ляхнин жавабдар инсанар а. Хъа саспи имамари гьамцдар ляхнар чпиз улихь хьайидарихъди гъягъюз даккнивалиан апlура. Ухьу саб республикайиъ яшамиш шулайидари сабпи Рамазандин ваз ккебгъну ккун ва сабси ккудубкlнура ккун. Гьаци гъябхьиш, халкьдин арайиъ мясляаьтра шул. Саб райондиъ багахь хьайи гъулариъ жюрбежюр йигъари машкврар апlури гъахьиш, фици шул? Фукьан вушра ужи дарди! Сари машквар апlури, хъа тмунури ушв дибисну шлуб вуйинхъа? Эгер варидарин саб гаф гъабхьиш, жямяаьтдизра рягьятди шулу. Гъит Аллагьу Тааьлайи халкьдин арайиъ сабвал хьпан бадали зегьмет зигуз дицдар имамариз кюмек туври!

- Саспи ксари Рамазандин вазлиъ никягь дивуз хай шулдар кlура. Йиз Рамазандин вазлихъан сумчир вуйиз, хъа думугандиз никягь дарапlди гъибтуз ккундарзуз, яна шурахъди учу сумчир хьайиз апlру гафар гьялалвалиинди дапIну ккундузуз. Узу кlурайиб чlуруб вуйинхъа?

- Уву кlурайиб гьякь ву. Рамазандин вазли никягь хай шулдар кlуруб дюз дар. Никягь апlувализ Рамазандин вазли манигъвал апlурадар. Думутlанна гъайри, уву кlуруганси, гьаму гирами вазли шурахъди гафар апlури жвуваз гунагь гъазанмиш апlайиз, никягь дапlну, гьалалвалиинди гаф-чlал апlури хьуб лап ужи ву. Гьаддиз эгер ичв никягь апlбаз шликlа манигъвал апlураш, имамдихьна, аьлимдихьна хъади душну, гьадрарихьди жаваб тувуз гъит - яв гаф гъадабгъурадаш, имамдин гаф гъадабгъур кlури умуд кивну.

Сабсана кlурзаки, саспидарин риш швушвди хъирсубси думу чан хпир ву кlури фикир шулу. Ваъ, уву дугъахъди никягь дарапlдикьан гагьди, думу увуз фужкlа шулдар. Никягь гъапlган, думу яв хпир шула ва муганаз гьярам вуйиб гьамус гьялалвализ илтlибкlура.

Гьаддиз, уву кlурайи гафар гьякьлудар ву ва гьадму гафар кlулиз адагъуз чалишмиш духьну ккун.

- Улубкьнайиб гирами Рамазандин ваз ву. Хябяхъдин вахтна жигьилар уч шули, ясана гьарйишван сарин хулаз чай убхъуз гъягъюри шулча, амма узуз Рамазандин ваз имиди гъягъюз ккундарзуз, гьаз гъапиш жарарилан улхуб гизаф шулу. Гирами вазли йиз апlурайи ибадат батlил апlуз ккундарзуз. Гъюз шуладарзухьан гъапиган имбудари гиран апlуру, ясана увухьна дуфну ккундарвуз, гьаддиз дестейихьан жара шулава кlури, лазим дару гафар арайиз гъюру. Гьаму дюшюшди фу гъапlиш ужи хьибди?

Ихь ибадат батlил дархьбан бадали, Рамазандин вазли аьхю гунгьарихьан лап ярхла духьну ккунду. Хъа жара касдилан улхуб аьхю гунгьарикан шула. Гьаддиз уву дурариз гъаври шлуганси му ляхникан мялумат тувну ккун. Уч хьуз къаршу дарза йип, амма саб шартl ади, уч гъахьиган жара касдилан улхурдарш. Думутlан гъайри, му вазли сарин хулаз уч духьнутlан, мистаз таравигь гъудгнариъ иштирак гъахьиш, ужи ву, ва дурариз гьадму ляхнихънара теклиф апlин.

- Цци Рамазандин ваз улубкьхъанмина йицlуд йисаъ айи йиз бали ушвар дисура. Дугъаз сабпиб ва аьхиримжи саб дибисну гъибт кlураза, амма хъпехъурдар. Дугъаз сабан ушв бисуб фарз шуладар аьхи.

Рамазандин вазлиъ бицlидариз яваш-явашди ушвар дисуз гъитуб ужи ву. Гьаци дурар ушвар дисури вердиш шул. Ав, уву кlуруганси дугъаз сабан гьеле фарз дубхьнадар, хъа чан жандин сагъвали ади ушвар гъидисну кlури, дидкан хайиртIан адар, гъит дисри. Эгер читинди вуш, эвелиъ 5 ушв, гьацlаъ шубуб ва аьхириъра шубуб ушв дисуз гъитиш, гьадмура ужи ву.