Суал-жаваб

- Гьюрматлу редакция! Йиз суалназ якьин жаваб тувайчва. Улихьнаси йиз гъунши дишагьли гирами жилариина уьмрайиз гъушнийи. Думу гъягъруган гизаф рази гъахьунза. Магьа душну гирами жилариина кьяляхъра гъафну, амма саб жюрейин дигиш’валар адар. Гьадмуган фициб чан чlуру хасият вуш, гьаму уьмрайин кьяляхъра гьациб пис хасият ими. Гьадина душну ужуб терефназди илтlикlур кlури, миж кади гъабхьнийиз, амма гьяйифки, фаркьвал адар. Аьлимари инсан, гирами жилариина гъушган, ужуб терефназди дигиш духьну ккун, кlури шулу. Гьамдин гьякьнаан фу пуз шулу?

- Гьяждиз, уьмрайиз гъушу кас ужуб терефназди илтlикlувал дугъан гьяж, ясана уьмра кьабул апlбан лишнарикан саб ву. Гирами жилариина гъушу инсанар вари саб дупну дигиш шулдар. Вушра гьаму гирами жилариин гъапlу ибадат, душван берекет дугъакра кубкlур кlури умуд кивдихьа. Хъа думу яв гъуншди фукlа чlуруб, ясана писвал апlураш, дугъаз учв наана душну кьяляхъ дуфнаш, кlваин апlуб ужи ву, белки гьадму гафарикан мяняфяаьт шул.

Гъит Аллагьу Тааьлайи вари мусурмнариз думу гирами жилар кьисмат апlри!

- Йиз хпирихьан дугъужвну гъудгнар апlуз шулдар, лап читинди ву. Саспи дишагьлийири дугъаз, увхьан шуладарвухьан, гьаддиз уву гъудган дарапlишра гунагь адар кlури, шулу. Гьадму дишагьлийири гъапибдихъ хъугърира шулу. Гьамдин гьякьнаан фу пуз шулу?

- Гъийин девриъ варитlан чlуруб гьадму вуки, диндин аьгъювалар адру ксарира кмиди диндин суалариз жавабар тувра. Думу лап аьхю гъалатl ву. Гьаму дюшюшдиъра, гьаз думу дишагьлийири чпиина гунагь гъадабгъурайкlа, гьаз дурариз Аллагьу Тааьлайихьан гучl кадайкlа? Фици дурарин мелзналан, гъудган мапlан, кlури улдубчlвурайкlа? Ухьуз шариаьтдиъ якьинди дупнаки, эгер шлихьанкlа дугъужвну гъудган апlуз шулдарш, дицир касди деъну гъудган апlуру. Шариаьтдиъ гьамци дупнайиган, думу дишагьлийириз «уву гъудган мапlан» пуз шли ихтияр тувнийкlа? Варитlан учlруб инсандин мелз ву, эгер мелз сикин апlуз шулдарш, диди инсанар лап чlуру ляхнарихънара кмиди хуру. Дицдар дишагьлийириз насигьят тувну ккунду, дурариз чпиз аьгъдру ляхнарин гьякьнаан жаваб тувуб гъадагъа дапlну ккун.

Гъит Аллагьу Тааьлайи ухьуз диндин аьгъювалар гъадагъуз кюмек туври, хъа жвуваз аьгъдрубдиз аьгъдарзуз пузра амур апlри!

- Риш швуваз тувназа. Гьамус варитlан асас суал дугъубжна, шурахъ фу хъапlруш, фукьан харжар адауруш. Гьаму шариаьтдиъ улупнайганси гьаз апlурдайкlан ихь инсанари? Гьамукьадар харжар гьаз адауру? Ухьуз варитlан асас вуйиб гьаму жигьилар шадди, сабпи нубатнаан, Аллагьу Тааьлайин, хъасин абйир-бабарин гъуллугънаъ ади хьуб дарин? Сарун фу герек ву?

- Гъит яв шуран гележег акуб ибшри, таза хизан бахтлу вуйиб ибшри. Уву кlурайи гафар дюзидар ву. Шариаьтдиъра ухькан мицдар харжар адауб тlалаб апlурадар. Гьяйифки, сумчрар апlбан гьякьнаан саспидар лапра шариаьтдихьан ярхла ву.

Сумчир рягьятди дапlну ккунду, хъа буржариъ учlвну, хъасин йисариинди буржар туври гъузруганси ваъ.

Эгер учву, кьюбиб терефарира, ихь веледар рягьят кайиганси эвлемиш апlурхьа кlури, йикьрар гъапlиш, ари гьадму варитlан ужи ву. Гьярам вуйиб ярхла дапlну, гьялал багахь дибисну ва гьадму вари апlру харжарра гъитну, гьаддикан сацlиб жигьилариз кюмек гъапlиш, чпин ккебгърайи уьмриъ, ари гьадму варитlан ужи ву. Хъа ухь’ан, инсанари фу кlур, аьйиб апlур кlури, жюрбежюр фикрариан думу ляхин тамамвалиинди апlуз удукьурадар.