Суал-жаваб
Ич гъулаъ сар кас гьаму йисан гьяждиз гъушну. Душваъ гизафдари папрус зигурайи кlури, учвра папрус зигуз хъюгъну, яни гьярам вуйиш, душваъ айидари зигурдайи, кlури. Гьамдин гьякьнаан фу пуз шулу?
Думу касдин фикир асиллагь дюзиб дар. Гьяждиъ айидар вари гунгьар ктрудар вуйинхъа?! Тмуну терефнаан, ухьуз гьяждиз гъушган рякъру гунгьар вари мушваъра дапlну ккундинхъа? Гьяждиз гъягъяйиз дициб гунагь апlури гъахьнушра, думу гирами жилариина гъушган, ухьу гунгьар дирчну ккунду. Ав, гьаму заманайиъ гьяждиз гъушган папрус зигрударра рякъюри шулу, хъа дурариз дилигну, жвуван гьюкум адабгъуз хай шулдар. Ухьуз гьяждиз гъушган рякъру папрус зигурайидар ухьуз нумуна дар, вари мусурмнариз ихь ккуни Пайгъамбар ﷺ нумуна духьну ккунду.
Гьаддиз ухьу, сабпи нубатнаан, фунуб вушра ляхин ихь шариаьтдин къанунарихъди дибккну ккун. Эгер къанундиз къаршуб вуш, думу шли апlури гъябкъишра, дидхьан ярхла духьну ккунду.
Гъит Аллагьу Тааьлайи ухьуз гьарсариз, иллагьки гьадму гирами жилариина гъушдариз, чlурубдихьан ярхла хьуз кюмек туври.
Гьаму йисан Уьмрайиз гъягъюз ният айиз. Хъа саспидари Уьмра гъапlиш, гьадму йисан дишлади гьяжра дапlну ккунду, кlури шулу. Гьаму гафарин мяна фициб ву?
Эгер инсандин Уьмрайиз дакьатар аш, дугъаз Уьмра фарз шула, ва думу тамам дапlну ккунду. Хъа Уьмра гъапlну кlури, гьадму йисан гьяжра дапlну ккунду кlуруб адар. Гьяж фарз шулу, эгер думу тамам апlуз мумкинвал аш.
Дици кIурайи инсанар гъалатl шула, думу фикир дюзиб дар, дици хай шулдар. Уьмрайиз дакьатар аш, Уьмра тамам апlуру, гьяждиз кьувват аш, гьяж тамам апlуру.
Гьаддиз, эгер гьаму йисан ичв Уьмра апlуз ният аш, думу ляхин тамам дапlну ккунду.
Инсанди чан уьмриъ муганаз гъудгнар апlури гъахьундар. Хъа гъудгнарихъ хъюгъну кьюб вазлилан думу кечмиш гъахьну. Гьамус саспидари, думу мусурман дар, кlура. Гьамдин ич жямяаьт гъаври адар. Эгер гъудгнар апlуз хъюгънуш, гьаз думу мусурман шуладар?
Гьяйифки, аьхиримжи вахтари бязидари мусурмнар садар тмундарихьан жара апlура. Уву кlурайи аьгьвалатнаъ дугъу чав йикIайиз гъудгнарра апlури гъахьнуш, мусурман дарди хьуз фици мумкин ву?! Дици кlуру ксар дюз дар. Думутlанна гъайри, эгер инсанди гъудгнар апlурдарш, амма думу гъудган фарз вуйивал тасдикь апlураш, дицир касдиз кяфир пуз шулдар. Думу аьхю гунагькар шула. Хъа гунагькар ву кlури дугъаз мусурман дар пуз шулдар. Эгер сар касди, гъудган фарз дар, кlури думу апlурадарш, думуган дугъан мусурманвалин лишнар гъузрадар. Гьаму месэлайин ухьу гъаври духьну ккунду. Хъа кьюб ваз улихьна думу касди, тавбу дапIну, гъудгнар апlуз хъюгънуш, думу чан гъахьи гунгьарихъан швумалвал зигури Аллагьу Тааьлайихьна илтlикlнайи кас шула, дугъаз гьичра мусурман дар пуз хай шулдар.
Вари шагьрар-гъулариъ айи мистариъ гьаму вахтна бицlидариз дарсар кивра. Йиз фикриан Дагъустандин Муфтиятдихъди гъярайи имамари му ляхин ужуб къайдайиинди гъабхура. Ич гъулан имамдиз улхьан йисанра ва гьаму йисанра бицlидариз дарсар тувуб тlалаб апlурача, амма фикир тутрувди гъибтра. Гьаму дюшюшдиъ фу дапlну ккунду?
Гьямд ибшри Аллагьу Тааьлайиз, магьа хьадан вахтна аьгъзрариинди бицlидари Ислам диндин мурхьларикан чпиз мялумат гъадабгъура. Думу ляхнин улихь гьучlвну кlулиз адабгъурайидариз аьхю чухсагъул дупну ккунду. Ав, вари йишвариъ думу дарсар гъягъюра. Эгер ичв гъулаъ дарсар туврадарш, гьаму газатдин почтайиз фунуб гъул вуш мялумат тувай, учу райондин имамарикан ккун дапlну, ичв гъулаъ дарсар шлуганси ккабалгуз гъитдихьа, ин ша Аллагь.
Гьамдихъди сабси абйир-бабарихьнара илтlикlну пуз ккундузузки, ичв веледар мистариз дарсариз гьауб герек ву, думу учвузра саваб шлу ляхин ву. Ичв веледари аьгъю гъапlу гьарсаб гьярфнахъ абйир-бабаризра саваб шулу. Гьаддиз гьамусдизкьан ичв веледар дарсариз гъягъюрадарш, гьаму имбу вахтнакьан дина гьауб лазим ву.
