СУАЛ-ЖАВАБ
- Магьа гирами Пайгъамбар ﷺ бабкан духьнайи ваз улубкьна. Ич гъулаъ аьхю мажлис гъабхьну. Йиз аьхюну бай узуз думу мажлиснаъ иштирак махьан, хай шлуб дар кlури, удукьну дугъужвну. Чиб-чпин арайиъ гизаф дерд шлу гафарра гъахьнийич. Му жигьилариз гьапlнайкlан? Гьамус Аллагь ва Пайгъамбар ﷺ кlваин апlру мажлисарра хай даршули гъахьнийин? Му гафарин кьяляхъ думу гьич жвуван веледсикьан рякъюрадарзуз. Гьаму жигьилар чlур апlурайидар фужар вуйкlан? Дурариз аьдати халкьдикан фу ккундаш, аьгъдарзуз. Саб йишваъ мажлис а гъапиган, йиз душваз гъягъюз лап улар хъади шуйиз. Гьамцдарикан фу дапlну ккун?
- Гьяйифки, саспи жигьиларин думу ляхнин гьякьнаан аьгьвалат ужуб дар. Чпиз диндин аьгъювалар адрувалиан шлихъ вушра хъпехъури, дурари имбу мусурман ксари апlурайи ибадат гунагьнануб ву кlура. Гъачай гьамци лигухьа. Мажлис ккебгъруган гирами Каламдиан аятар урхура, хъасин «Аллагьу Аллагь» кlури, Аллагь зикир апlура, хъасин Мугьяммад пайгъамбарин тяриф апlура, хъасин «Ла илагьа иллалЛагь» кlури урхура. Гьамус яв бализ ва гьацдар жара жигьилариз суал: гьаму ухьу ктухдариъ фукlа харжиб айкlан? Дарш дурар дурхну ккунидар дайкlан? Му суалариз дурарин жаваб адар! Вушра дурарин мусурмнарик хъанара тахсрар кирчуз юкIв шула. Дурар вари я чписдар фагьумсузарихъан, ясана интернетдиъ айи дин чlур апlурайидарихъан аьгъю шулайи гафар ву. Дурарикан саб вахтнара диндиз асуллагь мянфяаьт гъабхьиб дардар - анжагъ зарартlан. Гьаддиз шлубкьан аьгъю касдихьди яв балихъди гафар апlуз гъит. Белки гъаври шул, амма дурарикан саспидар гъаври аузра лап читин ву, дурариз гьякьвал рябкъюз ккундар, анжагъ чпин кIулиъ ипнайи гьякьлу мусурмнариз къаршуди дийигъузтlан. Гьаддиз вари жямяаьтдихъди, гъулан имамра кlулиъ ади, учву чиб-чпихъди мясляаьтнаъ гъузну ккунду. Эгер дици шулдарш, жара имамар, аьлимариз теклиф дапlну, учвуз варидариз насигьят тувуз гъитну ккунду.
- Узуз дугъриданна гъудгнар апIбахъ хъюгъюз ккундузуз, амма саспидар, гъудгнихъ хъюгъдарикан вагьабистар шулу кlуруган, гьадму рякъюъ узура ахъур кlури, гучl кади шулзуз. Мициб аьгьвалатнаъ узу фу дапlну ккунду?
- Уву дишлади гъудгнарихъ хъюгъну ккунду. Хъасин гьарсаб ккадапlу гъудгнихъан жаваб тувуз читинтIан читин хьибди. Гъудган апlуз аьгъю касдихъан дубгъну ккунду, шлихъан вушра ваъ. Гъийин девриъ фукьан вушра илим дурхнайи имамар, жигьилар а. Гьаци аьгъю касдихъан дубгъну ккунду. Хъа, узкан вагьабист шидикIан кlури, гучlар апlувалиан гъудгнар ккидирчуз зат хай даршул. Уву аьгъю касдихъди гъягъюри гъахьиш, гьякь рякълан улдугидар, иншаАллагь.
- Гьямд ибшри Аллагьу Тааьлайиз, улихьнаси йиз хпири хиджаб алабхьну. Думу ляхниин лап шад вуза. Хпириз думу фарзнакан ктибтури гизаф йисар вуйиз. Магьа Аллагьу Тааьлайин рягьимлувалиинди думу ляхин кIулиз удубчIвну. Амма саспи вахтари, наанкlа гъягъруган, ибарин кlакlар ачмишди гъитри шулу. Гьамци гъапlну кlури фу гунагь ахъа, кlури шулу. Мидин гьякьнаан думу фици гъаврикк ккаъза?
- МашаАллагь, гъит Аллагьу Тааьла увканра, яв хпириканра рази ишри. Думу Аллагь рази шлу ляхин ву. Ибарин кlакlар ачмишди гъитбакан кlуруш, яв хпириз вари жандак ккебкну гьадму тики гъибтбиинди аьхю зарар хьуз мумкин вуйиваликан мялумат тув. Вари беден цlихьан дюбхну, ибарин кlакlар цигъ дургну ккундийинхъа? Ваъ! Гьаму ляхникан хабар тув.
- Узу читин гьялнаъ аза. Муганаз узу йиз уьмриъ гьарган имбудариз кюмек апlури, дурарин гъуллугъар гьуркlри шуйза.Хъа гьамус узу читинвалиъ ахънайиган, багахьлуйиркьан багахь шуладариз. Дюнья гьадмукьан чlур дубхьна. Гьамус гьадрар дяркънукьан ккундарзуз. Мусурмнар чиб-чпиз кюмек апlрудар духьну ккунду, хъа сарин читинвал гъабхьиган - ярхла шлудар ваъ.
- Аллагьу Тааьлайи уву гъапlу кюмек кьабул апlри, Гъиямат йигъан дидин ужара шул. Гьарсаб ухьу марцци ният ади гъапlу ужувлан ляхин аьхиратдиъ бихъур. Му дюшюшдиъ инсанарик ваъ, Аллагьу Тааьлайик умуд кивну ккунду. Ав, саспи инсанар тмунуриз читинвал гъабхьиган шад шулу. Думу ужуб дару гъиллигъ ву. Мусурман кас дици духьну ккундар. Эгер увуз лап читинвал ади, кюмек герек вуш, ихь республикайин гизаф йишвариъ фондар а, гьадина илтlикlну ккунду. Инсанариканра гиран мапlан, дурар гьякь рякъюз илтlикlри кlури, дюаь апlин. Эгер гьякь рякъюз гъафиш, дурарикан мянфяаьтра артухъ шул.
