Суал-жаваб

Мусурман касдихь хпирди хьайи мусурман дару дишагьли фуник бицlирра кади кечмиш гъахьиш наан фаркьат апlуру?

Эгер мусурман касдихь хьайи мусурман дару хпир фуник бицlир ктарди кечмиш гъахьиш, думу мусурмнарин дару накьварихъ фаркьат апlуру.

Эгер дицир дишагьли фуник бицlир кади кечмиш гъахьиш, думуган дицир кас мусурмнарин ва мусурман дарударин накьварин арайиъ кивру. «Тугьфатуль Мугьтаж»

Гьюл’инди рякъюъ учIву касдин сефер наънан ккебгъру?

Эгер шагьур гьюлихъ хъучIубкьнаш ва гими гьюлин гъирагъдихънакьан гъюруш, думуган гими гъирагъдихьан гьудубчIвуз хъюгъюбси сефер ккебгъру.

Эгер гьюлин гъирагъдихъ шид цIиб вуди вая жара себеб ади гимихьан гъирагъдихьна гъюз шулдарш ва дидихьна люткейиъди душну ккундуш, думуган сефер ккебгъра лютка гьюлин гъирагъдихьан гьудубчIвуз хъюгъюбси.

Эгер порт, ясана гими шагьрихьан ярхлади вуш ва душвахьна жилилан душну ккундуш, думуган сефериъ учIвувал жвув яшамиш шулайи саргьятарилан улдучIвган шулу.

(«Тугьфат аль-Мугьтаж», Гьяшия аш-Ширвани)

Майит жара йишвариан гъулаз хьади гъюру вахтна машиндин чархариз муртйир йивну ккунду кlури шулу. Гьациб айиб вуйин?

Ваъ, думу аьдат ихь диндихъди аьлакьалуб дар ва дици дапlнура ккундар. Думу Аллагьу Тааьлайин гьюкмариз жвув гъаршу вуйивал улупурайиб ву, яни Аллагьу Тааьлайиз аьссивал апlуб ву. Гьаци вуйиган, думу ляхнихьан ярхла духьну ккунду ва дидкан аьгъдрударизра хабар тувну ккун.

Багхьантина майит гъабхруган гъудужвуб герек вуйин?

Багхьантина мусурман касдин майит гъабхруган, гьадгъахьна гьюрмат улупури гъудужвуб ужу ву, гьеле майит йисар тамам дархьуринуб вушра. («Нигьаят аль-Мухтаж».

Папрус зигру касдиз гьяждиз гъягъюз ихтияр айин?

Ав, дицир кас гъягъюб хъанара ужи ву, гьадина душну думу ужуб дару ляхин дипур кlури умуд кади. Хъа папрус зигура кlури гьяждиз гъягъюз мумикнвал аш, дурушди гъузуб гуннагь ву.

Узуз хуларра машинра азуз. Гьамус йиз бицlиризра квартира гъадабгъну аза, гьеле думу мектебдиъ урхури имишра. Гьаму дюшюшдиъ узу квартирайин пул тувну ужи вуйин дарш гьяж апlуб?

Эгер жвуваз жандин сагъвал, пулин дакьатар аш гьяж фарз шула. Амма ихь инсанарикан саспидари гьяждикан фикиркьан апlурдар. Магьа яв дюшюшра гьациб ву. Увуз хал-йишвра а, машинра а, гьаддихъди сабси гьеле мектебдиъ имбу веледдиз квартирайихъра шулхьа. Му дюшюшдиъ увуз гьяж фарз шула. Гизаф абйир-бабари веледариз хал-йишв гьязур апlурча кlури дакьатар гьадинди харж апlуру, хъа чпин ахиратдин хал-йишвкан фикир апlурдар. Гьаци вуйиган, шлубкьан ухди гьяждин суалназ фикир тув.

Ич гъулаъ мист тикмиш апlура. Мистаз пулиинди кюмек апlуб артухъ саваб вуйин дарш материалиинди?

Мист тикмиш апlувал ва душваъ иштирак хьувал аьхю савабнан ляхнарикан ву. Пайгъамбари ﷺ гьижра гъапlган сабпи ражари мист тикмиш апlуз хъюгъну. Яв суалнан гьякьнаан гьаму вахтна мистан фунубдиъ артухъ мюгьтаж’вал аш, ари гьацибдиинди кюмек апlбаъ саваб артухъ а.